Gold Silver Return 2026 Prediction: सोनं की चांदी? २०२६ मध्ये कोण देईल तुम्हाला अधिक रिटर्न, एक्सपर्टनं गणित सगळं सांगितलं

एमसीएक्सवर सोन्याच्या किमतीत सुमारे ७८ टक्क्यांची वाढ झाली आहे. सोन्याचा दर हा ७५,००० रुपयांवरून १.३३ लाख रुपये प्रति १० ग्रॅम झाला आहे. चांदीने गुंतवणूकदारांना सुखद धक्का दिला. ८५,००० रुपयांवरून २.०८ लाख रुपये प्रति किलोवर जवळजवळ १४४ टक्के वाढ झाली. दरम्यान, या काळात निफ्टी ५० मध्ये फक्त १० टक्के वाढ झाली. त्यामुळेच गुंतवणूकदारांनी सोने आणि चांदीला सुरक्षित आणि फायदेशीर पर्याय मानले.

जगभरातील मध्यवर्ती बँकांनी मोठ्या प्रमाणात सोने खरेदी केले, तर औद्योगिक क्षेत्रातून चांदीची मागणी वाढतच राहिली. अमेरिकेच्या कर वाढीमुळे जागतिक अर्थव्यवस्थेबद्दल अनिश्चितता निर्माण झाली. ज्यामुळे गुंतवणूकदार सोनं-चांदीमध्ये सुरक्षित गुंतवणूक म्हणून वळले.

२०२६ मध्ये सोनं-चांदी तेजीत असतील असे तज्ज्ञांचे मत आहे. मात्र, रिटर्न हे २०२५ प्रमाणे नसतील असा अंदाज आहे. सोने हा स्थिर परतावा देणारा कमी जोखीम असलेला पर्याय मानला जातो. कमी जागतिक व्याजदर, भू-राजकीय तणाव, कमकुवत डॉलर आणि ईटीएफ गुंतवणूकीमुळे सोन्याला आधार मिळण्याची अपेक्षा आहे.

एक्सपर्ट चांदीबद्दल अधिक सकारात्मक आहेत. चांदी एक मौल्यवान धातू आणि औद्योगिक धातू म्हणून काम करत असल्याने, त्यात लक्षणीय वाढ दिसून येऊ शकते. इलेक्ट्रिक वाहने, सौर पॅनेल आणि नवीन तंत्रज्ञानात चांदीची मागणी वाढत आहे. यामुळे अनेक तज्ञांचा असा विश्वास आहे की २०२६ मध्ये, विशेषतः वर्षाच्या पहिल्या सहामाहीत, चांदी सोन्यापेक्षा चांगले रिटर्न देऊ शकते.

तज्ञांच्या मते, २०२६ च्या अखेरीस आंतरराष्ट्रीय बाजारात सोने प्रति औंस ४,८०० डॉलर ते ५,५०० डॉलरपर्यंत पोहोचू शकते. यामुळे भारतीय बाजारात किंमत १,५०,००० रुपये ते १,६५,००० रुपयापर्यंत वाढू शकते. दरम्यान, चांदीचा दर प्रति औंस ७५ ते ८५ डॉलरपर्यंत पोहोचू शकतो, काही अंदाजानुसार तो १०० डॉलरपर्यंत पोहोचू शकतो. भारतीय बाजारपेठेत चांदीचे दर प्रति किलोग्रॅम २.३० लाख ते २.५० लाखांपर्यंत असण्याची अपेक्षा आहे.

एसआयपीद्वारे गुंतवणूक करणे श्रेयस्कर असल्याचे एक्सपर्ट सुचवतात. ज्यामुळे किमतीतील चढउतारांचा प्रभाव कमी होतो. चांदीमध्ये गुंतवणूक मर्यादित आणि टप्प्याटप्प्याने केली जाते. बाजारात चांगली संधी निर्माण झाल्यास धोरणात्मक एकरकमी (Lumpsum) गुंतवणूक देखील करता येईल. परंतु जोखीम समजून घेणे महत्त्वाचे आहे.

एकूणच, २०२६ मध्ये सोने स्थिरता आणि सुरक्षितता प्रदान करेल, तर चांदीमध्ये जास्त अस्थिरता असूनही उच्च परतावा देण्याची क्षमता आहे. गुंतवणूकदारांना त्यांच्या जोखीम क्षमतेनुसार आणि उद्दिष्टांनुसार गुंतवणुकीत संतुलन साधण्याचा सल्ला एक्सपर्टने दिला आहे.