Nashik News: लाल वादळ धडकलं मुंबईच्या वेशीवर, व्यापला नाशिक मुबंई महामार्ग

नाशिक जिल्ह्यातील आदिवासी भागातील विविध मागण्यांना घेऊन किसान सभा आणि मार्क्सवादी कम्युनिस्ट पक्षाच्या नेतृत्वामध्ये निघालेला लॉन्ग मार्च आज पाचव्या दिवशी नाशिकच्या घाटनदेवी कसारा या गावापर्यंत येऊन धडकला आहे.

लॉंग मार्च मध्ये हजारोंच्या संख्येने आदिवासी बांधव आणि शेतकरी सहभागी झाले आहे, वनजमिनीचे पट्टे मिळावे, मिळालेल्या वनजमिनींना स्वतंत्र सातबारे मिळावे, आदिवासी भागातील नद्यांचा वाहून जाणारे पाणी अडवून ते या भागातील स्थानिकांना आणि उत्तर महाराष्ट्राला वळत कराव, आदिवासी भागातील शाळा आश्रम शाळा यांची झालेली दुरावस्था शिक्षणाचा खालवलेला दर्जा अशा असंख्य मागण्यांना घेऊन हे मोर्चेकरी या आंदोलनात सहभागी झाले आहे.

जो पर्यंत यापूर्वी मंजूर करण्यात आलेल्या मागण्यांची अंमलबजावणी स्थानिक पातळीवर होत नाही तोपर्यंत हा मोर्चा थांबणार नाही अशा प्रकारचा इशारा या मोर्चाचे नेतृत्व करणाऱ्या कॉमेड जे पी गावित यांनी दिला आहे.

हातात लाल बावटा आणि आक्रोश करत निघालेल्या या शिस्तबद्ध मोर्चाने प्रशासनावर मोठा दबाव निर्माण केला आहे. ‘कोण म्हणतंय देत नाही, घेतल्याशिवाय राहत नाही’ अशा घोषणा देत आंदोलक देत आहेत.

पेठ, सुरगाणा, कळवण, चांदवड, सटाणा, मालेगाव, नांदगाव, येवला व सिन्नर तालुक्यांतील आंदोलक मोठ्या प्रमाणावर आहेत,

कोणी बाजरीची भाकरी तर कोणी तांदूळ-डाळ असा कोरडा शिधा सोबत घेतला आहे. ‘आम्ही आमची मीठ-भाकरी खाऊ, पण हक्क मिळवूनच जाऊ,’ अशा भावना आंदोलकांची आहे.

मोर्चात वृद्ध, महिला आणि तरुणांचा मोठ्या प्रमाणावर सहभाग आहे.