Mumbai Railway: CSMT अन् LTT चा ताण कमी होणार, मुंबईसाठी रेल्वेचा गेमचेंजर प्लॅन

मुंबई हे देशाची आर्थिक राजधानी असल्याने येथे महाराष्ट्रासह उत्तर, पूर्व आणि दक्षिण भारतातून लाखो लोक रोजगाराच्या शोधात येत असतात. या सतत वाढणाऱ्या प्रवासी संख्येचा भार केवळ मुंबई लोकलवरच नाही तर मेल–एक्स्प्रेस गाड्यांवरही मोठ्या प्रमाणात पडत आहे. हा वाढता ताण कमी करण्यासाठी परळ टर्मिनसचा विस्तार करण्यात येणार आहे. या ठिकाणी कुर्ला–परळ 5 व्या-6 व्या मार्गिकेशी जोडणीची मंजुरी मिळाल्याने हा टर्मिनस भविष्यात मोठ्या मेल–एक्स्प्रेस केंद्रात रुपांतरित होणार आहे. या प्रकल्पासाठी सुमारे 500 कोटींचा खर्च अपेक्षित आहे

या प्रकल्पांतर्गत परळ टर्मिनसला आधुनिक पायाभूत सुविधा मिळणार आहेत. यात दोन आयलंड प्लॅटफॉर्म, चार 26 कोच क्षमतेच्या प्लॅटफॉर्म लाईन्स, तसेच दोन 620 मीटरच्या स्टेबलिंग लाईन्स समाविष्ट आहेत. त्यासोबत प्लॅटफॉर्म डेक वाढवणे, प्रवाशांच्या हालचालीसाठी अतिरिक्त जागा, पार्किंग, प्रवेशद्वार आणि प्रसाधनगृह यांसारख्या सुविधाही उभारल्या जातील.

परळ स्थानकाचा विकास ‘अमृत भारत स्टेशन योजना’ अंतर्गत केला जात आहे. या योजनेमध्ये स्टेशनचे आधुनिकीकरण, नवीन प्रतीक्षागृहे, सुलभ प्रवासी सुविधा, सुरक्षा व्यवस्थेत सुधारणा, व्हीलचेअर अनुकूल मार्ग, लिफ्ट-एस्केलेटर यांसारख्या गोष्टींना प्राधान्य दिले गेले आहे. या उन्नतीकरणामुळे परळ स्टेशन प्रवाशांसाठी अधिक आरामदायी आणि आधुनिक होणार आहे.

CSMT, दादर, कुर्ला यांच्या बरोबरीने परळवरही अतिरिक्त प्लॅटफॉर्म्स बांधण्याचे काम सुरू आहे. त्यामुळे लोकल आणि लांब पल्ल्याच्या गाड्यांना स्वतंत्र मार्ग मिळणार आहेत. या नियोजनामुळे संपूर्ण मध्य रेल्वेच्या गर्दीचे उत्तम व्यवस्थापन होईल आणि गाड्यांची वेळेची शिस्त सुधारण्यासही मदत मिळेल.

दादर स्टेशनवरील प्रचंड गर्दीचा पर्याय म्हणून परळ स्थानकावर फास्ट लोकल थांबवण्याचा प्रस्ताव चर्चेत आहे. नवीन मार्गिका आणि प्लॅटफॉर्म्स तयार झाल्यानंतर हा थांबा लागू करण्यास गती मिळू शकते. यामुळे परळ पूर्व–पश्चिम परिसरातील लाखो प्रवाशांना प्रचंड दिलासा मिळेल आणि शहरातील कनेक्टिव्हिटीही वाढेल.