Exercise Benefits: फिट अँड फाईन राहण्याची इच्छा आहे? व्यायामासाठी द्या इतकी मिनिटे

नियमित व्यायाम हा निरोगी आणि तंदुरुस्त आयुष्याचा पाया मानला जातो. आरोग्य तज्ज्ञ सुशील थेटे यांच्या मते, व्यायामामुळे शरीरातील रक्ताभिसरण सुधारते आणि रोगप्रतिकारशक्ती वाढते. व्यायामाचा सर्वात मोठा फायदा म्हणजे शरीराची ताकद आणि सहनशक्ती वाढणे.

शरीराची नियमित हालचाल झाल्यामुळे स्नायू मजबूत होतात आणि हाडांची घनता टिकून राहते. धावणे, सायकलिंग, पोहणे, योगासने किंवा जिममधील व्यायाम या सर्व प्रकारांमुळे शरीराचा मेटाबॉलिझम वेग वाढतो. त्यामुळे शरीराचं वजन नियंत्रणात राहतं. मानसिक आरोग्यावर देखील व्यायामाचा प्रभाव पडतो. नियमित व्यायामामुळे एंडॉर्फिन नावाचं हॅपी हार्मोन्स स्रवतात. त्यामुळे ताणतणाव आणि नैराश्य कमी होते.

ज्येष्ठ नागरिकांनी हलक्या स्वरूपाचे व्यायाम, चालणे, स्ट्रेचिंग यांचा अवलंब करावा. मुलांना लहानपणापासून विविध खेळांची गोडी लावल्यास त्यांची शारीरिक क्षमता आणि शिस्तीची जाणीव वाढते. व्यायामामुळे झोपेची गुणवत्ता सुधारते, भूक लागते आणि दैनंदिन कामे करण्याची गती वाढते.

योगा आणि प्राणायम यामुळे मन शांत राहते व एकाग्रता वाढते. आरोग्य तज्ज्ञांच्या मते, दररोज सकाळी 15 मिनिटे प्राणायम केल्यास मेंदूचे कार्य सुधारते. अनुलोम, विलोम, कपालभाती आणि भ्रामरी प्राणायम सहज करता येतात. अभ्यास, नोकरी किंवा घरगुती जबाबदाऱ्या सांभाळणाऱ्यांसाठी हा मानसिक ताजेपणा फार महत्त्वाचा आहे.

व्यायाम हा फक्त आजार टाळण्यासाठी नाही तर एकूण जीवनमान सुधारण्यासाठी गरजेचा आहे. दिवसातून फक्त 30 ते 45 मिनिटे व्यायामासाठी दिल्यास दीर्घकाळ निरोगी राहता येते. व्यस्त वेळापत्रकातही व्यायामाला प्राधान्य दिल्यास जीवनात सकारात्मक बदल जाणवतात. त्यामुळे वय, व्यवसाय किंवा परिस्थिती काहीही असो, नियमित व्यायाम केला पाहिजे.