Weather Alert: डिसेंबरच्या पहिल्याच दिवशी मोठं संकट, 10 जिल्ह्यांत थंडीची लाट, IMDचा यलो अलर्ट

राज्यात ‘दितवाह’ चक्रीवादळाचा प्रभाव कायम असल्याने काही जिल्ह्यांत ढगाळ वातावरण बघायला मिळत आहे. अशातच आता अचानक गारठा वाढलाय. उत्तरेकडील थंड वाऱ्यांचा प्रवाह पुन्हा वाढल्याने किमान तापमानाचा पारा चांगलाच घसरलाय. काही ठिकाणी तापमानाचा पारा 8 अंश सेल्सिअस पर्यंत खाली गेलाय. त्यामुळे 1 डिसेंबर रोजी राज्यातील काही जिल्ह्यांना हवामान विभागाकडून शीत लहरींचा इशारा देण्यात आला आहे. 1 डिसेंबर रोजी राज्यातील तापमान आणि हवामान स्थितीबाबत जाणून घेऊ.

मुंबईत सोमवारी मुख्यतः निरभ्र आकाश राहून वातावरण कोरडे असणार आहे. कमाल तापमान 31 अंश सेल्सिअस तर किमान तापमान 15 अंश सेल्सिअस इतकं असू शकतं. कोकण विभागातील जिल्ह्यांत देखील वातावरण कोरडे राहणार आहे.

पश्चिम महाराष्ट्रात गारठा चांगलाच वाढलाय. पुण्यात 1 डिसेंबर रोजी शीत लहरींचा इशारा देण्यात आला आहे. तेथील कमाल तापमान 29 अंश सेल्सिअस तर किमान तापमान 10 अंश सेल्सिअस इतकं असू शकतं. पुणे घाटमाथा परिसरात देखील शीत लहरींचा इशारा देण्यात आला असून यलो अलर्ट जारी करण्यात आला आहे. पश्चिम महाराष्ट्रातील इतर शहरांत देखील तापमानात घट होणार आहे.

मराठवाड्यातील किमान तापमानात घट झाली असून गारठा वाढलाय. छत्रपती संभाजीनगरमध्ये शीत लहरींचा इशारा देण्यात आला आहे. तेथील कमाल तापमान 29 अंश सेल्सिअस तर किमान तापमान 9 अंश सेल्सिअस इतकं असू शकतं. मराठवाड्यातील छत्रपती संभाजीनगर, जालना , परभणी या तीन जिल्ह्यांत शीत लहरींचा इशारा देण्यात आला असून यलो अलर्ट जारी करण्यात आला आहे.

उत्तर महाराष्ट्रात एक अंकी तापमान नोंदवले जाण्याची शक्यता आहे. उत्तर महाराष्ट्रातील सर्व जिल्ह्यात शीतलऱींचा इशारा हवामान विभागाकडून देण्यात आला आहे. धुळे, नंदुरबार, जळगाव, नाशिक, नाशिक घाटमाथा, अहिल्यानगर या सर्व ठिकाणी शीत लहरींचा यलो अलर्ट जारी करण्यात आला आहे. नाशिकमधील कमाल तापमान 28 अंश सेल्सिअस तर किमान तापमान 9 अंश सेल्सिअस इतकं असू शकतं.

विदर्भातही तापमानात घट झाली असून हुडहुडी वाढली आहे. 30 नोव्हेंबर रोजी भंडारा येथे 10 अंश सेल्सिअस तापमानाची नोंद झाली. तर 1 डिसेंबर रोजी नागपूर शहरांत धुक्यासह ढगाळ वातावरण बघायला मिळू शकतं. तेथील कमाल तापमान 27 अंश सेल्सिअस तर किमान तापमान 11 अंश सेल्सिअस इतकं राहील.

राज्यात पुन्हा एकदा थंडीचा कडाका वाढण्यास सुरुवात झाली आहे. पुढील काही दिवसांत तापमानात घट होण्याची शक्यता आहे. त्यामुळे नागरिकांनी आरोग्याची काळजी घेणे गरजेचे आहे. तसेच वाढत्या थंडीमुळे तूर पीक धोक्यात येऊ शकतं. त्यामुळे शेतकऱ्यांनी तूर पिकांचे योग्य व्यवस्थापन करणे देखील महत्वाचे आहे.