Weather Alert : आता वारं बदलणार! महाराष्ट्राच्या दिशेनं नवं संकट, सगळीकडे जाणवणार; हवामान खात्याकडून अलर्ट

राज्यातील तापमानात सतत चढ-उतार सुरू असले तरी थंडीला पोषक वातावरण कायम असल्याने थंडीचा कडाका राज्यभर जाणवत आहे. विशेषतः सकाळच्या वेळी हवेतील गारवा अधिक तीव्र असून अनेक भागांत धुक्याची स्थिती पाहायला मिळत आहे. हवामान विभागानुसार पुढील काही दिवस राज्यात थंडीचा कडाका कायम राहण्याची शक्यता आहे. निफाड येथे 7 अंश सेल्सिअस तापमानाची नोंद झाली असून उत्तर महाराष्ट्र, मराठवाडा आणि विदर्भात गारठा वाढलेला आहे. 25 डिसेंबर रोजीही राज्यातील तापमानात घट कायम राहण्याचा अंदाज व्यक्त करण्यात आला आहे. पाहुयात 25 डिसेंबर रोजी राज्यातील तापमान आणि हवामानाची स्थिती कशी राहणार आहे.

मुंबईत तापमानात काहीशी घट जाणवत आहे. 25 डिसेंबर रोजी मुंबईतील कमाल तापमान 33 अंश सेल्सिअस तर किमान तापमान 20 अंश सेल्सिअस इतकं राहण्याची शक्यता आहे. शहरात निरभ्र आकाश राहील, मात्र सकाळच्या वेळी हवेतील गारवा जाणवेल. कोकण विभागातही बहुतांश ठिकाणी अशीच स्थिती राहण्याचा अंदाज आहे.

पश्चिम महाराष्ट्रात थंडीचा प्रभाव कायम आहे. पुणे शहरात 25 डिसेंबर रोजी कमाल तापमान 30 अंश सेल्सिअस तर किमान तापमान 9 अंश सेल्सिअस इतकं राहण्याची शक्यता आहे. पुण्यात सकाळच्या वेळी धुक्याची स्थिती राहणार असून त्यामुळे नागरिकांना गारठ्याचा सामना करावा लागणार आहे. परिसरातील इतर शहरांमध्येही थंडीमुळे हुडहुडी कायम आहे.

मराठवाड्यातही गारठा वाढलेला आहे. छत्रपती संभाजीनगर येथे कमाल तापमान 29 अंश सेल्सिअस तर किमान तापमान 12 अंश सेल्सिअस इतकं राहण्याची शक्यता आहे. सकाळच्या वेळी थंड वातावरणानंतर दिवसभर निरभ्र आकाश राहण्याचा अंदाज आहे. मराठवाड्यातील इतर भागांतही तापमानात फारसा बदल होण्याची शक्यता नाही.

उत्तर महाराष्ट्रात थंडीचा कडाका अधिक तीव्र झाला आहे. नाशिकमध्ये 25 डिसेंबर रोजी कमाल तापमान 28 अंश सेल्सिअस तर किमान तापमान 10 अंश सेल्सिअस इतकं राहणार आहे. परिसरात निरभ्र आकाश असले तरी सकाळच्या वेळी गारठा जाणवेल. अहिल्यानगर जिल्ह्यात किमान तापमान 10 अंश सेल्सिअसच्या खाली घसरले असून जळगावमध्येही तापमान 10 अंशांच्या खाली नोंदवले गेले आहे.

विदर्भातही थंडी कायम आहे. नागपूर शहरात 25 डिसेंबर रोजी कमाल तापमान 28 अंश सेल्सिअस तर किमान तापमान 11 अंश सेल्सिअस इतकं राहण्याची शक्यता आहे. येथे मुख्यतः निरभ्र आकाश राहील. विदर्भात सकाळी गारठा तर दुपारी सौम्य उन्हाचा अनुभव येत आहे.

राज्यात एकूणच तापमानाचा पारा खाली असल्याने नागरिकांनी आवश्यक ती काळजी घेणे गरजेचे आहे. थंडीपासून संरक्षणासाठी उबदार कपड्यांचा वापर करावा, सकाळी आणि रात्री अनावश्यक बाहेर पडणे टाळावे. तसेच वृद्ध, लहान मुले आणि आजारी व्यक्तींची विशेष काळजी घ्यावी, असे आवाहन प्रशासनाकडून करण्यात येत आहे.