Weather Alert: राज्यात शुक्रवारचा दिवस अतिमुसळधार पावसाचा, 6 जिल्ह्यांना रेड अलर्ट

राज्यात 25 जुलै रोजी विविध भागांमध्ये मुसळधार ते अतिमुसळधार पावसाची शक्यता हवामान विभागाने वर्तवली आहे. राज्यातील कोकण, पश्चिम महाराष्ट्र, विदर्भ तसेच मराठवाडा आणि उत्तर महाराष्ट्रातील जिल्ह्यांना यलो, ऑरेंज आणि रेड अलर्ट देण्यात आले आहेत. 25 जुलै रोजी राज्यात पावसाचा जोर जास्त असण्याची शक्यता आहे. त्यामुळे प्रशासनाने सर्व नागरिकांना सतर्क राहण्याचे आवाहन केले आहे. पाहुयात 25 जुलै रोजी राज्यातील हवामानाची स्थिती कशी राहील.

कोकण विभागात पालघर, ठाणे, मुंबई, रायगड, रत्नागिरी आणि सिंधुदुर्ग या सहा जिल्ह्यांमध्ये पावसाचा जोर वाढण्याची शक्यता आहे. पालघर जिल्ह्याला यलो अलर्ट जारी करण्यात आला आहे. ठाणे, मुंबई आणि सिंधुदुर्गला ऑरेंज अलर्ट देण्यात आला आहे. या जिल्ह्यांत मुसळधार ते अति मुसळधार पावसाची शक्यता आहे. रायगड आणि रत्नागिरी जिल्ह्यांना रेड अलर्ट जारी करण्यात आला आहे. या दोन जिल्ह्यांत अति मुसळधार पावसाची शक्यता वर्तवण्यात आली आहे.

पश्चिम महाराष्ट्रातील पुणे, सांगली आणि सोलापूर जिल्ह्यांमध्ये हलक्या ते मध्यम स्वरूपाच्या पावसाची शक्यता आहे. मात्र पुणे घाटमाथा, सातारा घाटमाथा आणि कोल्हापूर घाटमाथ्यावर मुसळधार ते अतिमुसळधार पावसाचा इशारा देण्यात आला आहे. पुणे आणि सातारा घाटमाथ्यावर रेड अलर्ट तर कोल्हापूर घाटमाथ्यासाठी ऑरेंज अलर्ट जारी करण्यात आला आहे. कोल्हापूर आणि सातारा जिल्ह्यांना यलो अलर्ट जारी करण्यात आला आहे. घाटमाथ्यावर दरड कोसळण्याचा धोका लक्षात घेता, पर्यटकांनी आणि वाहनचालकांनी खबरदारी घेण्याचे आवाहन करण्यात आले आहे.

मराठवाड्यातील छत्रपती संभाजीनगर, बीड, लातूर आणि धाराशिव जिल्ह्यांमध्ये हलक्या स्वरूपाचा पाऊस पडण्याची शक्यता आहे. दुसरीकडे, जालना, परभणी, हिंगोली आणि नांदेड जिल्ह्यांमध्ये वादळी वाऱ्यांसह आणि विजांच्या कडकडाटासह काही ठिकाणी जोरदार पाऊस, तर काही ठिकाणी हलका ते मध्यम पाऊस होण्याचा अंदाज आहे. या जिल्ह्यांना यलो अलर्ट जारी करण्यात आला आहे.

उत्तर महाराष्ट्रातील धुळे, नंदुरबार, जळगाव, नाशिक आणि अहिल्यानगर जिल्ह्यांमध्ये हलका ते मध्यम स्वरूपाचा पाऊस होण्याची शक्यता आहे. विशेषतः नाशिक घाटमाथ्यावर मुसळधार पावसाचा अंदाज वर्तवण्यात आला असून यलो अलर्ट जारी करण्यात आला आहे.

25 जुलै रोजी विदर्भात पावसाचा जोर जास्त जाणवणार आहे. अकोला, बुलढाणा, वाशिम आणि यवतमाळ जिल्ह्यांमध्ये वादळी वारे आणि विजांच्या कडकडाटासह पावसाची शक्यता असून यलो अलर्ट जारी केला आहे. अमरावतीमध्ये मुसळधार पावसाचा अंदाज असून यलो अलर्ट देण्यात आला आहे. दुसरीकडे भंडारा, चंद्रपूर, गडचिरोली आणि गोंदिया जिल्ह्यांमध्ये अति मुसळधार पावसाची शक्यता हवामान विभागानं वर्तवली आहे. त्यामुळे या जिल्ह्यांना रेड अलर्ट जारी करण्यात आला आहे.

नागपूर आणि वर्धा जिल्ह्यांना ऑरेंज अलर्ट देण्यात आला आहे. राज्यातील अनेक भागांमध्ये अति मुसळधार पावसाची शक्यता असल्याने वाहतूक यंत्रणा, शेती आणि जनजीवन विस्कळित होण्याची शक्यता आहे. नागरिकांनी प्रशासनाच्या सूचना लक्षात घ्याव्यात, अनावश्यक प्रवास टाळावा. विशेषतः डोंगराळ आणि नदीकाठी राहणाऱ्या नागरिकांनी सतर्क राहावे. आपत्कालीन परिस्थितीत स्थानिक प्रशासनाशी संपर्क साधावा, असे आवाहन प्रशासनाकडून करण्यात आले आहे.