Weather Alert: महाराष्ट्रात पावसाचं पुन्हा जोरदार कमबॅक, शुक्रवारी 14 जिल्ह्यांना अलर्ट

राज्यात 19 सप्टेंबर रोजी विविध भागांमध्ये वेगवेगळ्या प्रकारचे हवामान अनुभवायला मिळण्याची शक्यता आहे. हवामान खात्याने दिलेल्या अंदाजानुसार, काही जिल्ह्यांत हलक्या ते मध्यम पावसाची शक्यता आहे, तर काही ठिकाणी विजांच्या कडकडाटासह आणि वादळी वाऱ्यासह पावसाचा इशारा देण्यात आला आहे. तसेच काही जिल्ह्यांत कोरडे वातावरण राहणार असल्याची माहिती हवामान विभागानं दिली आहे. पाहुयात 19 सप्टेंबर रोजी राज्यातील हवामानाची स्थिती कशी राहील.

पालघर, ठाणे, मुंबई या जिल्ह्यांत हलक्या ते मध्यम स्वरूपाच्या पावसाची शक्यता आहे. तर रायगड, रत्नागिरी आणि सिंधुदुर्ग जिल्ह्यांत मध्यम स्वरूपाचा पाऊस पडेल, असा अंदाज हवामान विभागानं व्यक्त केला आहे. कोकण विभागात पावसाचा जोर काहीसा ओसरलेला दिसून येत आहे.

पुणे, कोल्हापूर, सातारा, सांगली या जिल्ह्यांत हलक्या ते मध्यम स्वरूपाचा पाऊस पडण्याची शक्यता आहे. घाटमाथा परिसरात तुलनेने अधिक म्हणजे मध्यम स्वरूपाचा पाऊस पडण्याची शक्यता आहे. सोलापूर जिल्ह्यात मात्र वादळी वाऱ्यासह आणि विजांच्या कडकडाटासह पावसाचा इशारा देत हवामान खात्याने यलो अलर्ट जारी केला आहे.

छत्रपती संभाजीनगर, जालना, परभणी, बीड, लातूर आणि धाराशिव जिल्ह्यांत वादळी वाऱ्यासह आणि विजांचा कडकडाट होण्याची शक्यता आहे. या जिल्ह्यांना पावसाचा यलो अलर्ट देण्यात आला आहे. हिंगोली आणि नांदेड जिल्ह्यांत मात्र हलक्या ते मध्यम स्वरूपाचा पाऊस पडण्याची शक्यता आहे.

धुळे, नंदुरबार आणि जळगाव जिल्ह्यांत हलक्या ते मध्यम स्वरूपाच्या पावसाचा अंदाज आहे. नाशिक जिल्ह्यात तसेच नाशिक घाटमाथा आणि अहिल्यानगर भागात विजांचा कडकडाट आणि वादळी वारे होण्याची शक्यता आहे. या भागांसाठी हवामान खात्याने यलो अलर्ट दिला आहे.

अमरावती, भंडारा, नागपूर आणि वर्धा या जिल्ह्यांत विजांच्या कडकडाटासह आणि वादळी वाऱ्यांसह पाऊस पडण्याची शक्यता आहे. या जिल्ह्यांना यलो अलर्ट जारी करण्यात आला आहे. मात्र अकोला, बुलढाणा, चंद्रपूर, गडचिरोली, गोंदिया, वाशिम आणि यवतमाळ या जिल्ह्यांत कोणताही पाऊस होणार नसून, हवामान कोरडे राहण्याची शक्यता आहे.

एकूणच 19 सप्टेंबर रोजी राज्यात पावसाचा जोर विभागानुसार वेगवेगळा राहणार आहे. कोकण, घाटमाथा परिसर, मराठवाडा आणि विदर्भातील काही जिल्ह्यांत विजांच्या कडकडाटासह पावसाची शक्यता आहे. त्यामुळे नागरिकांना सतर्क राहण्याचे आवाहन हवामान विभागाकडून करण्यात आले आहे.