Pune: एकेकाळी शरद पवारांच्या खास जवळचे सहकारी, आज फोटो पाहून ओळखताही येईना!

राजकारणामध्ये कधीच काही स्थिर राहत नाही. महाराष्ट्राच्या राजकारणामध्ये मागील काही वर्षांमध्ये इतके बदल झाले आहे की, कोणता नेता हा कुणासोबत होता आणि उद्या कुणासोबत असेल, हे सांगणं आता कठीण झालं आहे. राष्ट्रवादी काँग्रेस पक्ष आज दोन गटात वाटला गेला आहे. शरद पवार आणि अजित पवार गट असे दोन गट पडले. शरद पवारांसोबत असलेले अनेक नेते आणि विश्वासू सहकारी हे अजित पवारांच्या गटात सामील झाले. त्यापैकी एक नाव होतं दिलीप वळसे पाटील.

दिलीप वळसे पाटील हे संयमी आणि प्रशासकीय कौशल्यासाठी ओळखली जाणारे मंत्री आणि नेते म्हणून ओळखले जातात. शरद पवारांचे विश्वासू सहकारी म्हणून त्यांनी राष्ट्रवादीत अनेक चढउतार पाहिले. वळसे पाटील यांनी सुरुवातीला शरद पवार यांचे स्वीय सहाय्यक म्हणून काम पाहिलं. त्यांच्या हाताखाली राजकारणातले डावपेच शिकले. पुढे पवारांसोबत असताना त्यांनी सरकारमध्ये अनेक मंत्रिपदं भुषवली.

दिलीप वळसे पाटील यांनी पुण्याच्या आंबेगाव मतदारसंघातून पहिल्यांदा विधानसभा निवडणूक लढवली होती. त्यानंतर याच मतदारसंघातून ते सलग ९ वेळा आमदार म्हणून निवडून आले.

दिलीप वळसे पाटील यांनी काँग्रेस आणि राष्ट्रवादी आघाडी सरकारच्या काळात उच्च व तंत्रशिक्षण, वैद्यकीय शिक्षण, ऊर्जा, अर्थ आणि नियोजन, कामगार आणि राज्य उत्पादन शुल्क अशी मंत्रिपद सांभाळली.

दिलीप वळसे पाटील यांनी 2009 ते 2014 या काळामध्ये विधानसभेचे अध्यक्ष होते. वळसे पाटील हे अत्यंत शिस्तबद्ध आणि नियमाप्रमाणे काम करणारे होते. त्यामुळे विधिमंडळात त्यांना कडक हेडमास्तर म्हणून ओळखलं जायचं.

महाविकास आघाडी सरकारच्या काळात अनिल देशमुख यांनी राजीनामा दिल्यानंतर शरद पवार यांनी दिलीप वळसे पाटील यांच्याकडे गृहमंत्री म्हणून जबाबदारी स्वीकारली.

पुढे राष्ट्रवादीमध्ये फूट पडली आणि दिलीप वळसे पाटील यांनी अजित पवार गटात सामील झाले. महायुतीच्या 2023 ते 2024 या काळात ते सहकार मंत्री म्हणून काम पाहत होते.

मागील वर्षी विधानसभा निवडणुकीत प्रकृती अस्वस्थ असल्यामुळे त्यांनी निवडणूक न लढवण्याचा निर्णय जाहीर केला होता. पण पक्षाच्या आग्रहामुळे त्यांनी निवडणूक लढवली. प्रकृती ठीक नसतानाही वळसे पाटील लढले. या निवडणुकीत अवघ्या १५२३ मतांनी ते विजयी झाले.

महायुती सरकारमध्ये वळसे पाटील यांना मंत्रिपदाची संधी मिळाली नाही. त्यामुळे त्यांनी जाहीरपणे नाराजीही बोलून दाखवली होती.

मागील वर्षी मार्च २०२४ मध्ये दिलीप वळसे पाटील राहत्या घरात पडल्यामुळे त्यांना गंभीर दुखापत झाली होती. त्यांच्या खुब्यावर शस्त्रक्रिया पार पडली होती. त्यामुळे काही काळ त्यांनी राजकारणापासून काही दूर राहण्याचा निर्णय घेतला होता.

प्रकृतीच्या कारणामुळे काही काळ ब्रेक घेतल्यानंतर आता दिलीप वळसे पाटील सध्या आपल्या मतदारसंघात वेगवेगळ्या कार्यक्रमांना नेहमी हजर असतात. या वयातही वळसे पाटील हे मोठ्या उत्साहाने पदाधिकारी आणि विकासकामांसाठी आवर्जून जातात.