Weather Update : पश्चिम महाराष्ट्राला धोक्याची घंटा! 3 जिल्ह्यांना पावसाचा अलर्ट, पाहा हवामान अंदाज

वादळी पाऊस आणि ढगाळ हवामान असले तरी कमाल तापमानात चढ-उतार सुरूच आहे. त्यामुळे दुपारी उन्हाचा चटका तर सायंकाळ नंतर थंडगार हवा अनुभवण्यास मिळत आहे. शुक्रवार दिनांक 9 मे रोजी सातारा जिल्ह्यामध्ये तुरळ ठिकाणी वादळी पावसाने हजेरी लावली. तसेच नागपूर येथे राज्यातील उच्चांकी 39 अंश सेल्सिअस तापमानाची नोंद झाली.

पश्चिम महाराष्ट्रात सर्वाधिक तापमान राहिलेल्या सोलापूर जिल्ह्यातील पारा 36 अंशापर्यंत घटला आहे. पुढील काही दिवस पश्चिम महाराष्ट्रातील तुरळक ठिकाणी वादळी पावसाची शक्यता असून तापमानात देखील चढ-उतार राहणार असल्याचा अंदाज हवामान विभागाने व्यक्त केला आहे. पुढील 24 तासांसाठी पश्चिम महाराष्ट्रातील तीन जिल्ह्यांना वादळी पावसाची शक्यता असल्याने सतर्कतेचा यलो अलर्ट देण्यात आला आहे. पुढील 24 तासात असलेले जिल्हा निहाय हवामानाचे अंदाज जाणून घेऊ.

सातारा जिल्ह्यातील कमाल पारा 37 अंश सेल्सिअस तर किमान 24 अंश सेल्सिअस राहण्याचा अंदाज आहे. या काळात वादळी वाऱ्याची तसेच मुसळधार पावसाची शक्यता आहे. जिल्ह्यातील तुरळक ठिकाणी मागील 24 तासात पावसाने जोरदार हजेरी लावली असून पुढील दोन दिवस देखील साताऱ्याला सतर्कतेचा येलो अलर्ट हवामान विभागाने दिला आहे.

मागील 24 तासात कोल्हापुरातील तापमान 32.8 अंश सेल्सिअस राहिले. ढगाळ हवामान असल्याने वातावरणामध्ये गारवा निर्माण झाला आहे. पुढील 24 तासात कोल्हापूर जिल्ह्यात पावसासह वादळी वाऱ्याची शक्यता असल्याने भारतीय हवामान विभागाने सतर्कतेचा यलो अलर्ट जारी केला आहे. परा 34 अंशावर राहण्याचा अंदाज आहे. सोलापूर जिल्ह्यातील पारा कमी होऊन 36.6 अंशावर राहिला.

तसेच सोलापुरात ढगाळ आकाशासह हलक्या पावसाचा अंदाज हवामान विभागाने व्यक्त केला आहे. तापमानात अंशतः वाढ होवून पारा पुन्हा 39 अंशावर पोहचण्याचा अंदाज आहे. सांगली जिल्ह्यातील कमाल तापमानात अंशतः वाढ दिसून येते. मागील 24 तासात सांगलीत 35.7 अंश सेल्सिअस तापमान राहिले. तसेच येत्या 24 तासात जिल्ह्यातील तापमान 38 अंशावर राहण्याचा अंदाज आहे. ढगाळ आकाशासह हलक्या रिमझिम पावसाचा अंदाज हवामान विभागाने व्यक्त केला आहे.

पुणे जिल्ह्यात ढगाळ वातावरण असून मागील 24 तासात 32.8 अंश सेल्सिअस कमाल तापमानाची नोंद झाली. जिल्ह्यातील तुरळक ठिकाणी पावसाची नोंद झाली. तर पुढील 24 तासात पुण्यातील पारा 31 अंशांवर राहण्याचा अंदाज आहे. तसेच वादळी वाऱ्यासह तुरळक ठिकाणी पावसाचा अंदाज असल्याने सतर्कतेचा यलो अलर्ट भारतीय हवामान विभागाने जारी केला आहे.

राजस्थान आणि परिसरावर समुद्र सपाटीपासून 7.6 किलोमीटर उंचीवर चक्राकार वाऱ्यांची स्थिती आहे. त्यापासून गुजरात ते अरबी समुद्रापर्यंत हवेचा कमी दाबाचा पट्टा सक्रिय आहे. दक्षिण अंदमान समुद्रात चक्राकार वाऱ्यांची स्थिती आहे. यातच मॉन्सून 13 मे पर्यंत अंदमान आणि निकोबार बेटांवर दाखल होण्यास पोषक स्थिती आहे.