Weather Alert: मान्सूनचा जोर ओसरला, पण घाट भागाला झोडपणार, पुणे ते कोल्हापूर हवामान अंदाज

राज्यात मान्सून सक्रीय झाला असून कोकणसह विदर्भ आणि उत्तर महाराष्ट्रात पावसाचा जोर आहे. पश्चिम महाराष्ट्रातील घाट भागात जोरदार पाऊस सुरू आहे. तर उर्वरित भागात पावसाची तीव्रता काहीशी कमी राहण्याची शक्यता हवामान विभागाने वर्तविली आहे.

पुणे जिल्ह्यात मागील 24 तासात 30.1 अंश सेल्सिअस कमाल तापमानाची नोंद झाली. कोरेगाव परिसरात 0.5 मिलीमीटर पावसाची नोंद झाली. पुढील 24 तासात कमाल तापमान 31 अंशावर राहिल. पुण्यामध्ये पाऊस काहीशी उघडीप घेण्याची शक्यता असली तरीही पुणे घाटमाथ्यावर मात्र मध्यम पावसाची शक्यता आहे.

गेल्या 24 तासात कोल्हापूर परिसरात 11 मिलीमीटर पावसाची नोंद झाली. पुढील 24 तासात कोल्हापूरच्या घाटमाथ्यावर जोरदार पावसाची शक्यता आहे. यावेळी कमाल तापमान 28 अंश सेल्सिअस तर किमान तापमान 23 अंश सेल्सिअस वर असेल. जोरदार पावसाची शक्यता असल्याने भारतीय हवामान विभागाने कोल्हापूरच्या घाटमाथ्यास सावधानतेचा अलर्ट दिला आहे.

साताऱ्यातील पारा 28 अंश सेल्सिअसवर राहिला. तसेच मागील 24 तासात 37 मिलीमीटर पावसाची नोंद झाली. पुढील 24 तासात सातारा जिल्ह्यातील कमाल तापमान 27 अंशावर राहिल. सातारा घाटमाथ्यावर पावसाची शक्यता हवामान विभागाकडून वर्तवण्यात आली आहे.

सोलापूर जिल्ह्यात मंगळवारी कमाल तापमान 33.8 अंशावर राहिले. आज सोलापूर जिल्ह्यातील कमाल तापमान 34 अंशावर जाईल. तसेच जिल्ह्यात ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे.

सांगली जिल्ह्यात मंगळवारी 2 मिलिमीटर पावसाची नोंद झाली.पुढील 24 तासात सांगली जिल्ह्यात हलक्या पावसाचा अंदाज आहे. यावेळी जिल्ह्यातील कमाल तापमान 29 तर किमान तापमान 24 अंश सेल्सिअस इतके राहील.

पुढील 24 तासात संपूर्ण पश्चिम महाराष्ट्रात हलक्या पावसाची तसेच कोल्हापूर, सातारा आणि पुणे घाटमाथ्यास मात्र जोरदार पावसाची शक्यता हवामान विभागाकडून वर्तवण्यात आली आहे. त्यामुळे या भागातील नागरिकांना योग्य ती काळजी घ्यावी लागेल.