नवरात्रीच्या नऊ दिवसांत 'ही' 6 काम करणं बॅन, देवी लक्ष्मी होईल नाराज; होईल मोठं आर्थिक नुकसान

यंदा 19 मार्च ते 27 मार्च 2026 या कालावधीत चैत्र नवरात्र साजरी होत आहे. नवरात्रीचे नऊ दिवस हे आदिशक्तीच्या उपासनेचे आणि आत्मशुद्धीचे मानले जातात. शास्त्रांनुसार, या काळात भक्तांनी केवळ पूजेवरच लक्ष केंद्रित करू नये, तर आपल्या आचरणातही शिस्त पाळणे आवश्यक आहे. अनेकदा आपण नकळत अशा काही चुका करतो, ज्याने नवरात्रीच्या उपवासाचे फळ मिळत नाही आणि घरातून लक्ष्मी निघून जाते, असे मानले जाते.

तामसिक अन्नाचे सेवन: नवरात्रीच्या नऊ दिवसांत घरात पूर्णपणे सात्त्विक वातावरण असणे गरजेचे आहे. या काळात कांदा, लसूण, मांस आणि मद्यपान यांपासून दूर राहावे. "जसे अन्न, तसे मन" या उक्तीनुसार, तामसिक पदार्थ खाल्ल्याने मनात नकारात्मक विचार येतात आणि पूजेत अडथळे निर्माण होतात. यामुळे लक्ष्मी माता घराचा त्याग करते, अशी मान्यता आहे.

केस, दाढी आणि नखे ​​कापणे: शास्त्रांनुसार, नवरात्रीमध्ये केस कापणे, दाढी करणे किंवा नखे ​​कापणे अशुभ मानले जाते. विशेषतः ज्यांनी घरात 'घटस्थापना' केली आहे किंवा 'अखंड दीप' प्रज्वलित केला आहे, त्यांनी या नियमाचे काटेकोरपणे पालन करावे. यामुळे शरीरातील सकारात्मक ऊर्जेचा ऱ्हास होतो, असे मानले जाते.

चामड्याच्या वस्तूंचा वापर: पूजा करताना किंवा उपवासाच्या काळात कातड्यापासून बनवलेल्या वस्तू वापरणे टाळावे. चामडं हे मृत प्राण्यांच्या कातडीपासून बनते, जे अपवित्र मानले जाते. सात्त्विक ऊर्जेसाठी सुती किंवा रेशमी वस्त्रांना प्राधान्य द्यावे.

अखंड ज्योतीकडे दुर्लक्ष करणे: जर तुम्ही नवरात्रीत 'अखंड दीप' लावला असेल, तर तो नऊ दिवस सतत जळत राहील याची काळजी घ्या. दिवा विझणे हे अत्यंत अशुभ मानले जाते. घरात कोणीतरी एक व्यक्ती नेहमी उपस्थित असावी, जी वेळेवर दिव्यात तूप किंवा तेल टाकेल. विझलेला दिवा तुमच्या व्रतामध्ये खंड पाडतो.

कठोर बोलणे आणि वादविवाद: नवरात्रीत देवी माता शांततेचे प्रतीक असते. या दिवसांत कोणाचाही अपमान करणे, अपशब्द वापरणे, खोटे बोलणे किंवा घरात भांडणे करणे टाळावे. ज्या घरात सतत कलह असतो, तिथे लक्ष्मी कधीही टिकत नाही. शांत राहून नामस्मरण केल्यानेच उपवासाचे पूर्ण फळ मिळते.

दिवसा झोपणे: उपवास करणाऱ्या व्यक्तीने नवरात्रीच्या नऊ दिवसांत दिवसा झोपणे टाळावे. शास्त्रांनुसार, उपवासात दिवसा झोपल्याने आळस वाढतो आणि साधनेमध्ये व्यत्यय येतो. हा काळ मंत्रजप, भजन आणि कीर्तनासाठी असतो, त्यामुळे स्वतःला उत्साही ठेवणे आवश्यक आहे. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)