T20 वर्ल्ड कपच्या चारही सेमी फायनलिस्ट ठरल्या, टीम इंडियाचा सामना कधी, कुठे होणार?

वेस्ट इंडिजने दिलेलं 196 रनचं आव्हान टीम इंडियाने 19.2 ओव्हरमध्ये 5 विकेट गमावून पार केलं. टी-20 वर्ल्ड कपच्या इतिहासातलं टीम इंडियाने यशस्वीरित्या पार केलेलं हे पहिलंच एवढं मोठं आव्हान होतं. संजू सॅमसन हा टीम इंडियाच्या विजयाचा शिल्पकार ठरला.

संजूने 50 बॉलमध्ये 194 च्या स्ट्राईक रेटने नाबाद 97 रन केले, ज्यात 12 फोर आणि 4 सिक्सचा समावेश होता. याशिवाय तिलक वर्माने 15 बॉल 27 रनची महत्त्वाची खेळी करून टीम इंडियाचा विजय निश्चित केला.

वेस्ट इंडिजविरुद्धच्या या विजयासोबतच टीम इंडियाने त्यांचे सेमी फायनलचं तिकीटही निश्चित केलं आहे. टी-20 वर्ल्ड कपच्या सेमी फायनलमध्ये टीम इंडियासह दक्षिण आफ्रिका, इंग्लंड आणि न्यूझीलंड या चार टीम पोहोचल्या आहेत.

टी-20 वर्ल्ड कपची पहिली सेमी फायनल दक्षिण आफ्रिका आणि न्यूझीलंड यांच्यात होईल. बुधवार 4 मार्चला कोलकात्याच्या ईडन गार्डन स्टेडियमवर हा सामना रंगेल.

टीम इंडिया त्यांची सेमी फायनल इंग्लंडविरुद्ध खेळणार आहे. भारत आणि इंग्लंड यांच्यातील सेमी फायनल गुरूवार 5 मार्चला मुंबईच्या वानखेडे स्टेडियमवर होईल. इंग्लंडने या वर्ल्ड कपमधल्या सगळ्या मॅच जिंकल्या आहेत, तर भारताने दक्षिण आफ्रिकेविरुद्धचा पराभव वगळता उरलेल्या सामन्यांमध्ये विजय मिळवला आहे.

दक्षिण आफ्रिका विरुद्ध न्यूझीलंड आणि भारत विरुद्ध इंग्लंड यांच्यातल्या सेमी फायनलमध्ये ज्या 2 टीमचा विजय होईल, त्या फायनलमध्ये भिडतील. रविवार 8 मार्चला अहमदाबादच्या नरेंद्र मोदी स्टेडियमवर टी-20 वर्ल्ड कपची फायनल होणार आहे.