T20 World Cup : कोलंबोमध्ये पाऊस, सेमी फायनलचं समीकरण फिरलं! पाकिस्तानवर डाव उलटला!

पाकिस्तान आणि न्यूझीलंड यांच्यातला सुपर-8 चा सामना कोलंबोच्या प्रेमदासा स्टेडियममध्ये होत आहे. या सामन्यात पाकिस्तानचा कर्णधार सलमान आघाने टॉस जिंकून पहिले बॅटिंगचा निर्णय घेतला, पण टॉस सुरू होताच कोलंबोमध्ये पाऊस सुरू झाला.

कोलंबोमध्ये सतत पडत असलेल्या पावसामुळे हा सामना रद्द करण्याचा निर्णय घेण्यात आला आहे, त्यामुळे पाकिस्तान आणि न्यूझीलंडला प्रत्येकी 1-1 पॉईंट देण्यात आला आहे.

न्यूझीलंडविरुद्धचा सामना रद्द झाल्यामुळे पाकिस्तानला मोठा धक्का बसला आहे, कारण सुपर-8 मधला पाकिस्तानचा प्रेमदासा स्टेडियममधला हा शेवटचा सामना होता. उरलेले दोन्ही सामने पाकिस्तानला इंग्लंड आणि श्रीलंकेविरुद्ध पल्लेकेले स्टेडियममध्ये खेळायचे आहेत.

प्रेमदासा स्टेडियमची खेळपट्टी ही स्पिन बॉलिंगला मदत करणारी आहे, ज्याचा फायदा पाकिस्तानने ग्रुप स्टेजमध्ये उचलला, पण पल्लेकेले स्टेडियमच्या पिचवर मोठा स्कोअर होतो. इंग्लंड-श्रीलंकेविरुद्धच्या सामन्यात खेळपट्टीचा फटका पाकिस्तानला बसू शकतो.

पावसामुळे सामना रद्द झाला आहे, त्यामुळे दोन्ही टीमचा नेट रनरेट हा शून्य राहिला आहे. आता उरलेल्या दोन सामन्यांमध्ये ज्याचा विजय मोठा असेल ती टीम नेट रनरेटच्या जोरावर पुढे जाईल.

ग्रुप 1 आणि ग्रुप 2 मधून प्रत्येकी 2-2 टीमच सेमी फायनलला जातील. त्यामुळे सेमी फायनलला पोहोचण्यासाठी पाकिस्तान आणि न्यूझीलंडला त्यांचे उरलेले दोन्ही सामने जिंकावेच लागतील. या 2 पैकी एकाही सामन्यात पराभव झाला तर पाकिस्तान-न्यूझीलंडचं भवितव्य दुसऱ्या टीमवर अवलंबून राहिल.

आता पाकिस्तान-न्यूझीलंडच्या उरलेल्या मॅच इंग्लंड आणि श्रीलंकेविरुद्ध आहेत. यातली एक जरी मॅच गमावली तरी त्यांचे जास्तीत जास्त 3 पॉईंट होतील. पण श्रीलंका-इंग्लंडने त्यांच्या 2-2 मॅच जिंकल्या तरी त्यांचे 4 पॉईंट्स होतात, त्यामुळे पाकिस्तान-न्यूझीलंडसाठी पुढचा रस्ता खडतर होईल.