T20 World Cup : सेमी फायनलसाठी टीम इंडिया मुंबईमध्ये, पण... चंद्रग्रहण सुरू होताच काय केलं? वानखेडेवरून मोठी अपडेट!

टी-20 वर्ल्ड कपच्या सेमी फायनलमध्ये टीम इंडिया, दक्षिण आफ्रिका, इंग्लंड आणि न्यूझीलंड या चार टीम पोहोचल्या आहेत. सेमी फायनलमध्ये दक्षिण आफ्रिकेचा सामना न्यूझीलंडविरुद्ध होणार आहे, तर भारताची लढत इंग्लंडविरुद्ध होईल.

दक्षिण आफ्रिका आणि न्यूझीलंड यांच्यात 4 मार्चला कोलकात्याच्या इडन गार्डनमध्ये पहिली सेमी फायनल होईल, तर गुरूवार 5 मार्चला भारत आणि इंग्लंड मुंबईच्या वानखेडे स्टेडियमवर दुसऱ्या सेमी फायनलमध्ये खेळतील. या दोन सेमी फायनलमध्ये विजय मिळवलेल्या टीम 8 मार्चला टी-20 वर्ल्ड कपच्या फायनलमध्ये भिडतील.

टी-20 वर्ल्ड कपच्या सुपर-8 मधल्या शेवटच्या सामन्यात टीम इंडियाने वेस्ट इंडिजचा पराभव केला आणि सेमी फायनलमध्ये धडक मारली. रविवारी कोलकात्यामध्ये हा सामना झाल्यानंतर टीम इंडिया मुंबईमध्ये दाखल झाली आहे.

इंग्लंडविरुद्धच्या सेमी फायनलसाठी टीम इंडियाच्या प्रॅक्टिस सेशनला आजपासून सुरूवात होणार होती, पण भारतीय टीमने दुपारच्या सत्रामध्ये होणारा सराव टाळला आहे.

टीम इंडिया संध्याकाळी 7 वाजल्यापासून ते रात्री 9 वाजेपर्यंत मुंबईच्या वानखेडे स्टेडियमवर नेट प्रॅक्टिस करणार असल्याची माहिती सूत्रांनी दिली आहे. खग्रास चंद्रग्रहणामुळे टीम इंडियाने सराव टाळल्याचं सांगण्यात येत आहे.

खग्रास चंद्रग्रहणाला दुपारी 3 वाजून 20 मिनिटांनी सुरूवात झाली असून ग्रहण संध्याकाळी 6 वाजून 47 मिनिटांनी संपणार आहे. हे ग्रहण भारतात दिसणार असल्यामुळे सुतक काळ पाळला जाणार आहे, त्यामुळे टीम इंडियाने सराव केला नसल्याची माहिती सूत्रांनी दिली आहे.

ग्रहण संपल्यानंतर म्हणजेच संध्याकाळी 7 वाजता टीम इंडिया वानखेडे स्टेडियमवर फ्लड लाईट्समध्ये नेट प्रॅक्टिसला सुरूवात करेल.

सेमी फायनलसाठी भारत आणि इंग्लंड यांचा सराव दुपारपासून सुरू होणार होता. इंग्लंडने मात्र पूर्वनियोजित कार्यक्रमानुसार त्यांच्या सरावाला सुरूवात केली आहे.