दिसायला सामान्य, आत 'मृत्यूचं जाळं'! पुण्यात पोर्टर ॲप वापरून 300 हून अधिकांना पाठवलं 'ते' पार्सल; चौघांना अटक

अशी होती पद्धत

तपासात समोर आलेल्या माहितीनुसार, हे रॅकेट अतिशय नियोजनबद्ध पद्धतीने चालवले जात होते. आरोपी ड्रग्जची लहान पाकिटे तयार करून ती एखाद्या सामान्य वस्तूच्या पार्सलप्रमाणे पॅक करत असत. या पार्सलची डिलिव्हरी करण्यासाठी पोर्टर ॲपवरून डिलिव्हरी बॉय बोलावला जायचा. डिलिव्हरी बॉयला आत काय आहे याची कल्पना नसल्याने हे 'पार्सल' सुरक्षितपणे ग्राहकापर्यंत पोहोचत असे. ग्राहकांकडून ड्रग्जची ऑर्डर ऑनलाइन घेतली जात होती आणि व्यवहारही डिजिटल माध्यमांतून होत होते.

advertisement

300 हून अधिक ग्राहक पोलिसांच्या रडारवर

आरोपींच्या चौकशीत आतापर्यंत ३०० हून अधिक लोकांना ड्रग्ज पुरवल्याचे उघड झाले आहे. पोलिसांनी सापळा रचून आरोपींना ताब्यात घेतले असून, त्यांच्याकडून मोठ्या प्रमाणात एमडी ड्रग्ज जप्त करण्यात आले आहे. या रॅकेटचे धागेदोरे शहरात इतरत्र कुठे पसरले आहेत का, याचा शोध आता पोलीस घेत आहेत.

"आरोपींनी डिलिव्हरी ॲपचा गैरवापर करून ड्रग्ज पोहोचवल्याचे तपासात निष्पन्न झाले आहे. त्यांच्या चौकशीतून इतर पुरवठादार आणि मोठ्या रॅकेटची माहिती मिळण्याची शक्यता असून, तपास अधिक सखोलपणे सुरू आहे," अशी माहिती पोलीस उपायुक्त (परिमंडळ ३) संभाजी कदम यांनी दिली.