पुण्यातील लोकांसोबत मोठं कांड, कोट्यवधी रूपये घेऊन मुंबईत लपला सिद्धेश, वर्षभर वाचला पण शेवटी कर्माचं फळ मिळालंच

नेमकी फसवणूक कशी केली?

आरोपी सिद्धेश काळे (रा. कोलदरे) याने त्याचे साथीदार गणेश दत्तात्रय गव्हाणे आणि राहुल दिलीप काळे यांच्या मदतीने 'इडलवाईज ब्रोकिंग लिमिटेड' या नामांकित कंपनीच्या नावाखाली गुंतवणुकीचे जाळे विणले होते. वार्षिक ३० ते ४० टक्के परतावा देण्याचे आमिष दाखवून त्यांनी आंबेगाव परिसरातील अनेक गुंतवणूकदारांकडून कोट्यवधी रुपये गोळा केले. त्यानंतर परतावा न देता या रक्कमेचा अपहार केला.

advertisement

वर्षभराच्या लपाछपीनंतर पोलिसांनी आवळल्या मुसक्या

गुन्हा दाखल झाल्यापासून सिद्धेश काळे वारंवार आपले वास्तव्य बदलून पोलिसांपासून वाचण्याचा प्रयत्न करत होता. पुणे ग्रामीणचे पोलीस अधीक्षक संदीप सिंह गिल्ल यांच्या मार्गदर्शनाखाली घोडेगाव पोलीस पथकाने तांत्रिक विश्लेषण आणि गोपनीय माहितीच्या आधारे तो नवी मुंबईत असल्याची खात्री केली. तेथे सापळा रचून त्याला ताब्यात घेण्यात आले. त्याच्यावर 'महाराष्ट्र ठेवीदारांच्या हिताचे संरक्षण' (MPID) कायद्यांतर्गत कठोर कारवाई करण्यात आली आहे.

फसवणूक झालेल्यांना पोलिसांचे आवाहन

या प्रकरणात आणखी अनेक नागरिक फसवले गेले असण्याची शक्यता पोलिसांनी वर्तवली आहे. ज्यांची फसवणूक झाली आहे, त्यांनी भीती न बाळगता घोडेगाव पोलीस ठाण्यात संपर्क साधावा, असे आवाहन सहाय्यक पोलीस निरीक्षक सागर पवार यांनी केले आहे. या कारवाईमुळे परिसरात मोठी खळबळ उडाली असून गुंतवणुकीच्या नावाखाली चालणाऱ्या रॅकेटचा पर्दाफाश झाला आहे.