तो मुंबईत मोठा अधिकारी पण त्या गोड आवाजाच्या जाळ्यात अडकला अन् धक्कादायक घडलं; ऑनलाईन ओळख अन् महिलेचं नको ते कांड

विवाहाचे आमिष अन् ब्लॅकमेलिंगचा सापळा

मिळालेल्या माहितीनुसार, २०२३ मध्ये या अधिकाऱ्याची ओळख मॅट्रिमोनिअल साईटवर नागपूरमधील एका महिलेशी झाली. सुरुवातीला गोड बोलून विवाहाचे आमिष दाखवत महिलेने अधिकाऱ्याचा विश्वास संपादन केला. त्यानंतर घरगुती आणि वैयक्तिक कारणांचे निमित्त साधून तिने पैसे मागण्यास सुरुवात केली. अधिकाऱ्याने आतापर्यंत वेळोवेळी एकूण ४२ लाख ८७ हजार रुपये दिले.

advertisement

बलात्काराच्या गुन्ह्याची धमकी

जेव्हा अधिकाऱ्याला संशय आला आणि त्यांनी पैशांचा जाब विचारला, तेव्हा या महिलेने आपल्या साथीदारांसह मिळून त्यांना धमकावण्यास सुरुवात केली. "बलात्काराची खोटी फिर्याद देऊन तुला आयुष्यभर तुरुंगात सडवू," अशी धमकी देऊन आरोपींनी अधिकाऱ्याकडे पुन्हा ७ लाख रुपयांची खंडणी मागितली. या सततच्या मानसिक त्रासाला आणि ब्लॅकमेलिंगला कंटाळून अखेर अधिकाऱ्याने पुण्याच्या भारती विद्यापीठ पोलीस ठाण्यात धाव घेतली.

पोलीस कारवाई सुरू

वरिष्ठ पोलीस निरीक्षक राहुलकुमार खिलारे यांच्या मार्गदर्शनाखाली पोलिसांनी या प्रकरणाचा तपास सुरू केला आहे. उच्चपदस्थ अधिकारी अशा प्रकारे हनी ट्रॅपमध्ये अडकल्याने प्रशासकीय वर्तुळात एकच खळबळ उडाली आहे. "अनोळखी व्यक्तींशी संवाद साधताना सावध राहावे," असे आवाहन पोलिसांनी नागरिकांना केले आहे