Pune News : पुणेकरांनो आरोग्याला जपा! शहरात डेंग्यूचे रुग्ण वाढले, धक्कादायक आकडेवारी समोर

महापालिकेच्या आरोग्य विभागाने दिलेल्या माहितीनुसार, जानेवारीत 134 ठिकाणी डासोत्पत्ती नोंदली गेली आणि या महिन्यात 39 संशयित डेंगी रुग्ण आढळले. मात्र, त्यापैकी निश्चित निदान झालेले रुग्ण नव्हते. फेब्रुवारीत संशयित रुग्णांची संख्या 31 वर आली आणि या महिन्यात 4 जणांचा अहवाल डेंग्यू पॉझिटिव्ह आला. डासोत्पत्तीच्या दृष्टीने फेब्रुवारीत 40 ठिकाणी आढळले. मार्च महिन्यात 76, मेमध्ये 383, जूनमध्ये 577, जुलैमध्ये 680, आणि ऑगस्टमध्ये 261 ठिकाणी नोटिसा बजावण्यात आल्या. जुलैमध्ये सर्वाधिक नोटिसा आणि दंड वसूल झाल्याचे महापालिकेने सांगितले.

advertisement

जानेवारी ते ऑगस्ट दरम्यान 1169 संशयित डेंग्यूचे रुग्ण नोंदवले गेले, त्यापैकी 41 जणांचे अहवाल पॉझिटिव्ह आले आहेत. याशिवाय, 16 रुग्णांमध्ये चिकुनगुनियाचे निदान झाले आहे. त्यामुळे नागरिकांना स्वच्छता राखण्याचे आवाहन करण्यात आले आहे.

कीटक प्रतिबंधक विभागाने नागरिकांना सूचित केले आहे की, घरात किंवा परिसरात कुठेही पाणी साचू देऊ नये. पाण्याच्या टाक्या नेहमी झाकून ठेवाव्यात, कुंड्या, जुने भांडे किंवा टप्पे यांमध्ये पाणी जमा होऊ नये, याची विशेष दक्षता घ्यावी. वेळोवेळी ही काळजी घेतल्यास डेंग्यू आणि चिकुनगुनिया यांसारख्या रोगांवर नियंत्रण ठेवणे शक्य होईल.

त्याचप्रमाणे, ताप, डोकेदुखी किंवा शरीरात वेदना आल्यास लगेच वैद्यकीय तज्ज्ञांचा सल्ला घ्यावा आणि घरीच उपचार घेण्याचा प्रयत्न करू नये, असेही विभागाने नागरिकांना सांगितले आहे. डासांचा प्रसार रोखण्यासाठी घरात, शाळा, ऑफिस किंवा सार्वजनिक ठिकाणी स्वच्छता राखणे अत्यंत गरजेचे आहे. नागरिकांनी घराभोवती पाणी साचलेले नसावे याची काळजी घेतली, तर डेंग्यू आणि चिकुनगुनिया रोगांचा प्रसार रोखणे शक्य होईल.

एकंदरीत, पुणे महापालिकेची ही मोहीम डासोत्पत्तीवर नियंत्रण ठेवण्यासाठी आणि नागरिकांना या रोगांपासून सुरक्षित ठेवण्यासाठी महत्त्वाची पावलं ठरत आहेत.