TRENDING:
भररस्त्यात 'XUV' मधून पळवले
दुपारच्या सुमारास पृथ्वीराज लखन दळवी या तरुणाला काळ्या रंगाच्या एक्सयूव्ही ७०० (MH 12 XE 5353) कारमधून जबरदस्तीने बसवून नेण्यात आले. कुटुंबीयांनी तत्काळ पोलिसांशी संपर्क साधला आणि 'ग्राम सुरक्षा यंत्रणे'द्वारे हा मेसेज वाऱ्यासारखा पसरला. पुणे ग्रामीण पोलिसांनी क्षणाचाही विलंब न लावता संपूर्ण परिसरात 'सर्जिकल' नाकाबंदी लागू केली.
advertisement
उसाच्या शेतात रंगला पाठलागाचा थरार
जेऊर-नीरा मार्गावर नाकाबंदी असताना पोलिसांना संशयित कार दिसली. पोलिसांनी इशारा देऊनही चालकाने कारचा वेग वाढवला. पोलिसांनी पाठलाग सुरू केल्यावर अपहरणकर्त्यांनी कार पिसुर्टीच्या दिशेने अरुंद रस्त्यावर घातली. वेगाच्या नादात कार थेट उसाच्या शेतात शिरली आणि चिखलात रुतली. पोलिसांनी कारला घेराव घातल्याचे पाहताच आरोपींनी दाट उसात उड्या मारून पळ काढला. पोलिसांनी तत्काळ कारची झडती घेऊन पृथ्वीराजची सुरक्षित सुटका केली.
नीरा आऊटपोस्टचे पीएसआय रविराज कोकरे, हरिश्चंद्र करे आणि प्रसाद कोळेकर यांनी केवळ नाकाबंदीवर न थांबता ५ किमी पुढे जाऊन रस्ता रोखला. त्यांच्या या धाडसामुळेच अपहरणकर्ते मुख्य रस्त्यावरून भरकटले. सध्या आरोपी फरार असून त्यांच्या शोधासाठी पथके रवाना करण्यात आली आहेत. हे अपहरण खंडणीसाठी होते की जुन्या वैयक्तिक वैरातून, याचा तपास पोलीस करत आहेत. सध्या पृथ्वीराज सुखरूप असून त्याच्या सुटकेनंतर कापूरहोळ परिसरात पोलिसांनी सुटकेचा नि:श्वास टाकला आहे.