TRENDING:
पुण्याचे लोकप्रतिनिधी सुरक्षित नाहीत का?
‘परवानाधारक पिस्तूल’ वापरणाऱ्यांमध्ये नवनिर्वाचित नगरसेवकांचा देखील समावेश आहे. त्यामुळे पुण्याचे लोकप्रतिनिधी सुरक्षित नाहीत का? असा सवाल उपस्थित होतोय. पुणे महापालिकेत पिस्तूल घेऊन फिरणाऱ्या नगरसेवकांना थेट अपात्रतेचा सामना करावा लागणार असल्याचा इशारा पुण्याचे महापालिका आयुक्त नवल किशोर राम यांनी दिलाय. त्यामुळे महापालिकेत शस्त्रांसह येणाऱ्यावर आता कठोर निर्बंध लागू होणार आहेत.
advertisement
पिस्तूल घेऊन सभागृहात प्रवेश करण्याचा प्रयत्न
नगरसेवकांनी पिस्तुल महापालिकेत आणू नये, या अनुषंगाने महापालिकेत मेटल डिटेक्टर बसवण्यात आले आहेत. अशी माहिती देखील नवल किशोर राम यांनी दिली आहे. काही दिवसांपूर्वी महापालिकेच्या मुख्य सभेदरम्यान एका नगरसेवकाने थेट पिस्तूल घेऊन सभागृहात प्रवेश करण्याचा प्रयत्न केला होता. मात्र, प्रवेशद्वारावर तैनात असलेल्या सजग सुरक्षा रक्षकांनी त्यांना रोखले.
डोक्याला पिस्तुल लावून धमकी
केवळ नगरसेवकच नव्हे, तर अनेक पदाधिकारी आणि कार्यकर्तेही शस्त्रे घेऊन फिरत असल्याने सुरक्षेचा मोठा पेच निर्माण झाला आहे. महापौर मंजूषा नागपुरे यांच्या दालनाबाहेर ‘डोअर फ्रेम मेटल डिटेक्टर’ यंत्रणा बसवण्यात आली आहे.आता महापौरांना भेटायला येणाऱ्या प्रत्येक नागरिकाची आणि कार्यकर्त्याची सखोल तपासणी करूनच त्यांना आत सोडले जात आहे. दोन महिन्यांपूर्वी पुण्यातील कोंढवा भागातील एका नागरिकाने अधिकाऱ्यांसमोर डोक्याला पिस्तुल लावून आत्महत्या करण्याची धमकी दिली होती. त्यानंतर आता मोठे निर्णय घेतले जात आहेत.