Youtube वर पाहिलं अन् निर्णय घेतला, नोकरी करत सुरू केला थंडगार पेयाचा व्यवसाय, आता डबल कमाई

रश्मीच्या कुटुंबाबद्दल सांगायचं झालं तर तिची आई अंगणवाडी सेविका आहे, तर वडील सरकारी नोकरीत कार्यरत आहेत. घरची परिस्थिती स्थिर असली तरी स्वतः काहीतरी वेगळं करण्याची इच्छा रश्मीच्या मनात अनेक वर्षांपासून होती. तिला फूड क्षेत्राची आवड होती, पण सुरुवात कशी करावी हे समजत नव्हतं.

शेवटी आता काहीतरी करायचंच असा निर्णय घेत रश्मीने स्वतःच पुढाकार घेतला. तिने स्वतःच्या सेव्हिंग्जमधील पैसे वापरले आणि सोशल मीडिया व YouTube च्या मदतीने विविध पेयांच्या रेसिपी शिकल्या. योग्य माप आणि चव मिळवण्यासाठी तिने घरीच अनेक प्रयोग केले. सरबत, मोहितो, कच्च्या कैरीचा रस, कोकम सरबत यांसारखी पेये ती बनवू लागली.

यानंतर तिने स्वतःचा थंडगार पेयांचा स्टॉल सुरू केला. स्टॉलसाठी लागणारे साहित्य, छत्री, भांडी यासाठी तिने सुमारे 10 ते 15 हजार रुपयांची गुंतवणूक केली. सुरुवातीला तिच्या या निर्णयाला वडिलांचा विरोध होता, मात्र आईने तिला पाठिंबा दिला. स्टॉल सुरू केल्यानंतर पहिल्याच दोन दिवसांत मिळालेला चांगला प्रतिसाद पाहून वडिलांनीही तिच्या कामाला साथ दिली आणि आवश्यक वस्तू आणून मदत केली. रश्मीने व्यवसाय वाढवण्यासाठी सोशल मीडियाचाही वापर केला. दररोज व्हिडिओ आणि अपडेट्स शेअर करत तिने आपल्या स्टॉलची माहिती लोकांपर्यंत पोहोचवली, ज्यामुळे ग्राहकांची संख्या वाढली.