TRENDING:
नवीन 'मिस्ट्री' अस्त्र बाहेर काढणार
स्टार स्पिनर वरुण चक्रवर्ती आता पाकिस्तानविरुद्धच्या आगामी हाय-व्होल्टेज मॅचमध्ये एक नवीन 'मिस्ट्री' अस्त्र बाहेर काढण्याच्या तयारीत आहे. कोलंबोच्या मैदानावर होणाऱ्या या महत्त्वाच्या लढतीत वरुण आपल्या गोलंदाजीतील वैविध्य दाखवण्यासाठी सज्ज झाला असून, त्याने तसे संकेतही दिले आहेत. गेल्या काही काळापासून तो आपल्या बॉलिंगवर विशेष मेहनत घेत असून रविवारी होणाऱ्या सामन्यात पाकिस्तानी बॅटर्सला चकवा देण्यासाठी वरूण चक्रवर्ती सज्ज आहे. पाकिस्तानला वरूणने इशारा दिलाय.
advertisement
काय म्हणाला वरूण चक्रवर्ती?
मी काही नवीन गोष्टींवर काम करत आहे आणि ही माझी सतत चालणारी प्रक्रिया आहे. माझ्याकडे नेहमीच काहीतरी नवीन बॉल तयार असतो. जर माझ्यात पुरेसा आत्मविश्वास असेल, तर मी पुढच्या मॅचमध्ये त्याचा वापर नक्कीच करेन, असं वरूण चक्रवर्ती म्हणाला आहे. श्रीलंकेतील खेळपट्ट्या संथ असल्या तरी येथील बाउंड्री मोठ्या आहेत, याचा फायदा घेण्यासाठी तो चेंडू हवेत अधिक फ्लाईट देण्याचा प्रयत्न करणार आहे. आर. प्रेमदासा स्टेडियमवरील परिस्थिती त्याच्या फिरकीसाठी पूरक ठरू शकते.
बॅटर्सच्या दांड्या गुल
दरम्यान, गेल्या काही वर्षांत वरुणने आपल्या फॉलो थ्रू मध्ये मोठे बदल केले आहेत. त्याने साईड-स्पिन ऐवजी ओव्हर-स्पिनवर अधिक लक्ष केंद्रित केलंय, ज्यामुळे त्याचा बॉल खेळपट्टीवर पडल्यानंतर वेगाने फलंदाजाकडे येतो अन् बॅटरला काहीही कळत नाही. बॉल कसा येतोय, हे लक्षात येण्याआधीच बॅटर्सच्या दांड्या गुल झालेल्या असतात.