मीडिया रिपोर्ट्सनुसार, शाकिब अल हसनने पाकिस्तान सुपर लीगच्या 10 व्या हंगामात खेळण्याची पुष्टी केली आहे. शाकिब लाहोर कलंदर्सकडून खेळेल. पीएसएलमधला शाकिबचा हा तिसरा संघ असेल. याआधी 2016 मध्ये शाकिब कराची किंग्जकडून खेळला होता. तर 2017 मध्ये त्याने शेवटची पीएसएल पेशावर झल्मीकडून खेळली होती. लाहोर कलंदर्स सध्या पीएसएल पॉइंट्स टेबलमध्ये चौथ्या स्थानावर आहे.
advertisement
आयपीएलमध्ये दोघांकडून खेळला शाकिब
पीएसएलमध्ये लाहोर कलंदर्सने शाकिबला किती पैसे दिले आहेत? याबाबत अजून माहिती मिळू शकलेली नाही, पण आयपीएलचे 11 हंगाम खेळून शाकिबने 26.25 कोटींची कमाई केली आहे. 2011 साली शाकिब अल हसनने केकेआरकडून पदार्पण केले, केकेआरने शाकिबला 1.95 कोटी रुपयांना विकत घेतले होते. सलग 7 मोसम केकेआरकडून खेळल्यानंतर 2018 साली सनरायजर्स हैदराबादने शाकिबला 2 कोटी रुपयांना विकत घेतलं. यानंतर 2019 च्या मोसमासाठी हैदराबादने शाकिबला टीममध्ये कायम ठेवलं.
2020 मध्ये एसआरएचने शाकिबला सोडल्यानंतर, केकेआरने त्याला 2021 च्या आयपीएल हंगामासाठी परत विकत घेतले, यानंतर 2022 मध्ये शाकिब खेळला नाही, पण तो 2023 च्या आयपीएलमध्ये केकेआरकडून पुन्हा खेळताना दिसला. 2025 च्या आयपीएलसाठी शाकिबने त्याची बेस प्राईस 1 कोटी रुपये ठेवली होती. पण तरीही, कोणत्याही टीमने त्याला खरेदी केले नाही. आयपीएलच्या 11 हंगामात 2 संघांकडून खेळताना शकिब अल हसनने मिळवलेली एकूण रक्कम 26.25 कोटी रुपये इतकी आहे.
शाकिब पीएसएलमध्ये का खेळणार?
आयपीएलमध्ये कोणत्याच टीमने विकत न घेतल्यामुळे शाकिब आता पीएसएलमध्ये खेळणार आहे. बांगलादेशची क्रिकेट टीम 17 मे पासून यूएईसोबत टी-20 मालिका खेळणार आहे. पण क्रिकेटच्या छोट्या फॉरमॅटमधून निवृत्ती घेतल्यामुळे, शाकिब बांगलादेश टीमचा भाग नाही, म्हणूनच पीएसएलमध्ये खेळण्याचा त्याचा मार्ग पूर्णपणे मोकळा झाला आहे.
शाकिब अल हसन बराच काळ क्रिकेटपासून दूर आहे. तो शेवटचा अबू धाबी टी-10 लीगमध्ये बांगला टायगर्सकडून खेळताना दिसला होता. शाकिबने गेल्या वर्षी सप्टेंबरमध्ये आशिया कपमध्ये शेवटचा आंतरराष्ट्रीय सामना खेळला. त्याने चॅम्पियन्स ट्रॉफीमध्येही भाग घेतला नाही. इंग्लंडमधील काउंटी चॅम्पियनशिपमध्ये सरेकडून खेळताना शाकिबच्या बॉलिंग अॅक्शनवरही प्रश्न उपस्थित करण्यात आले होते. त्यानंतर त्याने बॉलिंग टेस्ट दिली, ज्यामध्ये तो पास झाला.