Pakistan vs Namibia : पाकिस्तानच्या ड्रेसिंग रूममध्ये उभी फूट! तीन खेळाडूंमुळे दोन गटात राडा, 'आफ्रिदी' गटाचा खेळाडू फुटला

पाकिस्तान क्रिकेटमध्ये दोन गट 

पाकिस्तानचा स्टार खेळाडू बाबर आझम, शाहीन शाह आफ्रिदी आणि शाबाद खान या तीन खेळाडूंना डच्चू देण्यात यावा, अशी चर्चा पाकिस्तानच्या ड्रेसिंग रुममध्ये होताना दिसत आहे. मीडिया रिपोर्ट्सनुसार, कोलंबोमधील प्रॅक्टिस दरम्यान पाकिस्तानचा कॅप्टन सलमान आगा आणि हेड कोच माईक हेसन यांच्यात प्रदीर्घ चर्चा झाली. यावेळी मतभेदावरून पाकिस्तान क्रिकेटमध्ये दोन गट पडल्याची चर्चा आहे. या चर्चेचा मुख्य केंद्रबिंदू बाबर आझम आणि शाहीन आफ्रिदी यांचा फॉर्म हाच होता.

advertisement

बाबर आणि शाहीनला बाहेरचा रस्ता?

सूत्रांच्या माहितीनुसार, अनुभवी खेळाडूंची खराब कामगिरी पाहता मॅनेजमेंट त्यांना बाहेर बसवण्याचा धाडसी निर्णय घेऊ शकते. शाहीन शाह आफ्रिदी गटातील खेळाडू आता सलमान अली आगा याला सपोर्ट करताना दिसत आहेत. सलग पराभवामुळे टीममधील वातावरण सध्या तणावपूर्ण असल्याचे दिसून येत आहे. जर बाबर आणि शाहीन सारख्या मोठ्या नावांना ड्रॉप केले, तर त्याचा टीमच्या मानसिकतेवर काय परिणाम होतो हे पाहणे औत्सुक्याचे ठरेल. नामीबियाचा संघ या संधीचा फायदा घेऊन मोठा उलटफेर करण्याचा प्रयत्न करेल, यात शंका नाही.

पाकिस्तानसाठी 'करो या मरो'

दरम्यान, ग्रुप-ए च्या पॉइंट्स टेबलमध्ये पाकिस्तान सध्या 3 पैकी 2 मॅच जिंकून तिसऱ्या क्रमांकावर आहे. भारत या ग्रुपमधून आधीच सुपर-8 साठी पात्र ठरला असून, आता दुसऱ्या जागेसाठी युएसए आणि पाकिस्तान यांच्यात चुरस पाहायला मिळत आहे. जर पाकिस्तान हा सामना हारला, तर ते वर्ल्ड कपच्या शर्यतीतून थेट बाहेर होतील आणि युएसएसाठी सुपर-8 चे दरवाजे उघडले जातील. त्यामुळे हा सामना पाकिस्तानसाठी 'करो या मरो' असा ठरणार आहे.