Youtube, Instagram की Facebook कोणामुळे लवकर संपतो फोनमधील डेटा? वेळीच बदला सेटिंग

"अरे, अजून तर दुपारही झाली नाही, मग एवढा डेटा गेला कुठे?" हा प्रश्न तुमच्याही मनात येत असेल, तर तुम्ही एकटे नाही आहात. घराबाहेर असताना किंवा वायफाय कनेक्टेड नसताना आपला मोबाईल डेटा एखाद्या वाळूसारखा हातातून निसटून जातो. याला कारणीभूत असतात आपल्या मोबाईलमधील लाडकी सोशल मीडिया ॲप्स. ही ॲप्स बॅकग्राउंडला सतत रिफ्रेश होत असतात आणि हाय-क्वालिटी कंटेंटमुळे तुमचा डेटा फस्त करतात. चला तर मग जाणून घेऊया, कोणते ॲप्स तुमचा खिसा (आणि डेटा) रिकामा करत आहेत.

advertisement

1. YouTube: डेटा गिळणारं सर्वात मोठं मशिन

जर तुम्ही यूट्यूबवर 'शॉर्ट्स' किंवा लांब व्हिडिओ पाहत असाल, तर सावध राहा. एका अहवालानुसार, तुम्ही जर स्टँडर्ड क्वालिटीमध्ये (480पी) व्हिडिओ पाहत असाल, तरीही हे ॲप एका तासात तब्बल 3GB पर्यंत डेटा वापरू शकतं. हाय-डेफिनेशन (HD) व्हिडिओ तर तुमच्या 1.5 जीबीच्या प्लॅनचा काही मिनिटांतच निकाल लावतात.

टीप: डेटा वाचवण्यासाठी व्हिडिओ सेटिंगमध्ये जाऊन 'Data Saver' मोड ऑन करा.

2. Instagram: रिल्सची मजा पण डेटाची सजा

इन्स्टाग्रामवर एकामागून एक रिल्स पाहणं जितकं मजेशीर आहे, तितकंच ते डेटासाठी घातक आहे. हे ॲप कंटेंट आधीच 'प्री-लोड' (Pre-load) करतं, जेणेकरून तुम्हाला व्हिडिओ पाहताना लोडिंगची वाट पाहावी लागू नये. यामुळे एका तासाच्या वापरामागे 500MB ते 1GB डेटा सहज खर्च होतो. हाय-क्वालिटी फोटोंमुळे ही खपत आणखी वाढते.

3. Facebook: स्क्रोलिंगमध्येच 50 एमबी गायब

फेसबुक आता फक्त फोटो पाहण्यापुरतं मर्यादित राहिलेलं नाही. यावर मिळणारे व्हिडिओ आणि ऑटो-प्ले होणाऱ्या जाहिराती तुमचा डेटा वेगाने ओढतात. तुम्ही फक्त फीड स्क्रोल केलं तरी 50-100 एमबी डेटा जातो. पण जर तुम्ही फेसबुक वॉच किंवा रिल्स सेक्शनमध्ये गेलात, तर हा आकडा 1 जीबीच्या पुढे जाऊ शकतो.

4. Pinterest: दिसायला साधं पण डेटासाठी महागडं

जेव्हा तुम्ही रेसिपी, फॅशन किंवा घराचं डिझाइन पाहण्यासाठी पिंटरेस्ट (Pinterest) उघडता, तेव्हा तुमच्या मोबाईलचा डेटा रॉकेटच्या वेगाने संपतो. यावर असलेल्या हाय-रिझोल्युशन इमेजेसची लांबलचक यादी लोड होण्यासाठी खूप शक्ती लागते. धक्कादायक म्हणजे, हे ॲप केवळ 5 मिनिटांत 85MB डेटा खाऊ शकतं.

डेटा वाचवण्यासाठी काय कराल?

ॲप सेटिंग: प्रत्येक सोशल मीडिया ॲपच्या सेटिंगमध्ये जाऊन 'Data Saver' मोड ऑन करा.

फेसबुक आणि इंस्टाग्रामवरील व्हिडिओ 'ऑटो-प्ले' होणार नाहीत याची काळजी घ्या.

शक्य असल्यास मोठे व्हिडिओ किंवा रिल्स केवळ वायफायवरच पाहा.

मोबाईलच्या सेटिंगमध्ये जाऊन अनावश्यक ॲप्सचा 'Background Data' डिसेबल करा.

तंत्रज्ञान आपल्या सोयीसाठी आहे, पण जर ते आपल्या खिशाला जड जात असेल तर स्मार्ट होणं गरजेचं आहे. वरील ॲप्स वापरताना थोडी काळजी घेतली, तर तुमचा डेली डेटा दिवसभर आरामात टिकू शकेल.