TRENDING:
इराणच्या शाळेत असलेल्या १७५ मुलींच्या मृत्यूसाठी अमेरिकन गुप्तचर यंत्रणेचे अपयश असल्याचे स्पष्ट झाले आहे. 'न्यूयॉर्क टाइम्स'ने दिलेल्या अहवालानुसार, अमेरिकन लष्कराने चुकून एका प्राथमिक शाळेला इराणचा लष्करी तळ समजून लक्ष्य केले असल्याचे म्हटले आहे.
नेमकं काय घडलं?
२८ फेब्रुवारी रोजी युद्ध सुरू असताना अमेरिकेने इराणवर टॉमहॉक मिसाइलने हल्ला चढवला होता. 'शजराह तैय्येबेह' या प्राथमिक शाळेची इमारत अमेरिकेच्या टार्गेट लिस्टमध्ये होती. मात्र, अमेरिकन लष्कराला असे वाटले होते की हा इराणचा लष्करी तळ आहे. प्रत्यक्षात, ही इमारत पूर्वी लष्कराचा भाग होती, परंतु अनेक वर्षांपासून तिथे शाळा भरत होती.
advertisement
जुन्या माहितीचा आधार घेणं पडलं महागात
तपासातून समोर आले आहे की, अमेरिकन सेंट्रल कमांडने ज्या कोऑर्डिनेट्सवर (Coordinates) हल्ला केला, ते 'डिफेंस इंटेलिजेंस एजेंसी'ने दिलेल्या जुन्या माहितीवर आधारित होते. ही माहिती पुन्हा क्रॉस-चेक न करताच क्षेपणास्त्र डागण्यात आले. ज्यावेळी हा हल्ला झाला, तेव्हा शाळा सुटली होती आणि पालक आपल्या मुलांना घरी नेण्यासाठी शाळेत पोहोचले होते. याच दरम्यान झालेल्या हल्ल्यात १७५ निष्पाप मुलींना प्राण गमवावे लागले.
ट्रम्प यांच्या विधानामुळे गुंता वाढला
सुरुवातीला अमेरिका या हल्ल्याची जबाबदारी घेण्यास नकार देत होती. राष्ट्राध्यक्ष डोनाल्ड ट्रम्प यांनी तर या हल्ल्यासाठी इराणच जबाबदार असावा, असे विधान केले होते. मात्र, आता अमेरिकन लष्कराच्या अंतर्गत तपासानेच ट्रम्प यांच्या दाव्यावर प्रश्नचिन्ह उभे केले आहे. प्राथमिक निष्कर्षांनुसार, हे क्षेपणास्त्र अमेरिकेचेच होते आणि टार्गेट निवडण्यात मोठी चूक झाली होती हे समोर आलं आहे.