Pakistan: लग्नाचं मंडप झालं कब्रिस्तान, संगीत सोहळ्यात आत्मघाती हल्ला, 7 जणांचा मृत्यू, 25 रक्ताच्या थारोळ्यात

जेवण सुरू होतं आणि अचानक 'तो' आला...

उत्तर-पश्चिमी पाकिस्तानच्या खैबर पख्तूनख्वा प्रांतात एका लग्नसोहळ्यावर काळाने झडप घातली. एका आत्मघाती हल्लेखोराने स्वतःला उडवून दिल्याने लग्नाच्या मंडपात स्मशान शांतता पसरली होती. डेरा इस्माइल खान जिल्ह्यातील सरकार समर्थक नेते नूर आलम महसूद यांच्या घरी लग्नाची लगबग सुरू होती. प्रत्यक्षदर्शिनी दिलेल्या माहितीनुसार, काही पाहुणे जेवणाचा आनंद घेत होते. तर तरुण मंडळी संगीताच्या तालावर ठेका धरत होती. त्याचवेळी एक संशयास्पद व्यक्ती गर्दीत शिरली आणि काही कळण्याच्या आतच मोठा स्फोट झाला. या भीषण स्फोटात ७ जणांचा जागीच मृत्यू झाला, तर २५ हून अधिक लोक जखमी झाले आहेत.

advertisement

हल्ल्यामागे नक्की कोणाचा हात?

स्थानिक पोलीस प्रमुख अदनान खान यांनी दिलेल्या माहितीनुसार, हा हल्ला जाणीवपूर्वक गर्दीच्या ठिकाणी करण्यात आला. अद्याप कोणत्याही संघटनेने या हल्ल्याची जबाबदारी स्वीकारलेली नाही. मात्र, या भागात सक्रिय असलेल्या तहरीक-ए-तालिबान पाकिस्तान या दहशतवादी संघटनेवर संशयाची सुई आहे. २०२१ मध्ये अफगाणिस्तानात तालिबानची सत्ता आल्यापासून टीटीपीच्या कारवायांमध्ये मोठी वाढ झाली असून, निष्पाप नागरिकांना लक्ष्य करण्याचे प्रमाण वाढले आहे.

रुग्णालयात उपचार सुरू

घटनेनंतर जखमींना तातडीने जवळच्या रुग्णालयात दाखल करण्यात आले आहे. मृतांमध्ये नूर आलम महसूद यांच्या जवळच्या नातेवाईकांचा समावेश असल्याचे समजते. रुग्णालयाबाहेर नातेवाईकांचा आक्रोश हृदय पिळवटून टाकणारा आहे. जखमींपैकी अनेकांची प्रकृती चिंताजनक असल्याने मृतांचा आकडा वाढण्याची भीती व्यक्त केली जात आहे. ज्या घरातून डोली निघणार होती, तिथून आता अंत्ययात्रा काढण्याची वेळ आली.