तुमच्या कष्टाचं चीज होणार! 1, 10, 19 आणि 28 तारखेला जन्माला आलेल्या व्यक्तींसाठी कसं असेल नवं वर्ष

1 या अंकाचा स्वभाव अतिशय महत्त्वाकांक्षी, कोणाचेही उपकार स्वतःवरती न ठेवणारा, समाजामध्ये पुढाकार घेऊन कोणत्याही गोष्टीची सुरुवात करणारा, खोटे बोलणे न आवडणारा, सामाजिक क्षेत्रांमध्ये नेतृत्व करण्याची आवड असणारा, कोणाचाही अंमल स्वतःवरती न चालवणारा असा ओळखला जातो. 1 या अंकाचा प्रभाव असणारे व्यक्ती किंवा एक हा मूलांक किंवा शुभांक असणाऱ्या व्यक्ती या आपले प्रेम व्यक्त करीत नाहीत. या व्यक्ती प्रेमळ असल्या तरी त्यांना ते व्यक्त करायला जमत नाही. त्यामुळे बऱ्याच वेळा त्यांच्या प्रेमाबद्दल गैरसमज निर्माण होतात.

1 अंकाचा स्वामी रवी व 9 अंकाचा स्वामी मंगळ हे दोन्ही परस्परांचे मित्र ग्रह असल्याने किंवा हे एकमेकांचे मित्रांक आहेत. त्यामुळे आगामी 2025 हे वर्ष 1 हा शुभांक किंवा मुलांक असणाऱ्यांसाठी अतिशय शुभकारक जाणार आहे. पण त्याचा अर्थ आपण फक्त हातावर हात धरून बसावे असा नाही. तर याचा अर्थ आपण जे कष्ट कराल त्या कष्टाचे चीज या वर्षात होणार असून कोणतेही कष्ट वाया जाणार नाही, असा असल्याचं ज्योतिषशास्त्री कदम सांगतात.

2025 मध्ये 1 या अंकाने आपले जे काही नियोजना असेल ते ठरवावे. आपणास काय हवे आहे व काय करायचे आहे? हे ठरवल्यानंतर या वर्षात त्या गोष्टी पूर्णत्वाला जातील. कारण रवी महत्त्वाकांक्षी ग्रह असला तरी महत्त्वकांक्षा पूर्ण होण्यासाठी आत्मविश्वास, धाडस आवश्यक आहे. आतापर्यंत या बाबी मनासारखी नसल्याने महत्त्वकांक्षा पूर्ण होत नव्हत्या. मात्र आगामी वर्षात 9 या ग्रहाचा म्हणजेच मंगळाचा प्रभाव आहे. मंगळ हा आत्मविश्वासाचा, धाडसाचा, कर्तृत्वाचा ग्रह असल्यामुळे तो 1 या अंकाच्या महत्त्वकांक्षा पूर्ण करण्यासाठी निश्चितच मदत करेल. तो तेवढा आत्मविश्वास व तेवढे धाडस 1 या अंकामध्ये निर्माण करेल व महत्त्वाकांक्षा पूर्णत्वाला नेण्यासाठी फलदायी ठरेल. राजकीय क्षेत्रामध्ये कार्यरत असणाऱ्या व्यक्तींना हे वर्ष चांगले फलदायक जाईल, असंही ज्योतिषशास्त्री सांगतात.

मंगळासाठी साधारणपणे गणपती व मारुती यांच्या उपासना फलदायी ठरतात. त्यामुळे 1 हा अंक असणाऱ्या व्यक्तींनी आपल्या महत्त्वाकांक्षा पूर्णत्वाला जाण्याकरता व आपली आडलेली कामे पूर्ण होण्यासाठी मारुती किंवा गणपतीची उपासना करणे फलदायी ठरेल. मंगळवारी मारुतीला किंवा गणपतीला जाऊन त्याचे दर्शन घेणे लाभदायक ठरेल. तसेच गणेश स्तोत्र किंवा हनुमान चालीसा वाचणे देखील त्यांच्यासाठी फायदेशीर ठरू शकते, असंही ज्योतिषशास्त्री सांगतात.