पोलीस सांगून लुटले तब्बल 103 कोटी रुपये, थेट एनकाऊंटर करण्याची द्यायचे धमकी, टोळीचे परदेशी कनेक्शन

मुजफ्फरपुर : देशात दिवसेंदिवस गुन्हेगारीच्या घटना समोर येत आहेत. आर्थिक फसवणुकीच्या घटनांमध्ये वाढ होत असल्याचे दिसत आहेत. सायबर क्राईमच्या माध्यमातून अनेक जणांना बळी बनवले जात आहेत. यातच आता आणखी एक धक्कादायक घटना समोर आली आहे. पोलीस बनून सायबर गुन्हेगारांनी तब्बल 103 कोटी रुपयांची लूट केल्याची घटना समोर आल्यानंतर मोठी खळबळ उडाली आहे.

मुजफ्फरपुर पोलिसांनी सायबर फसवणूक करणाऱ्या एका मोठ्या टोळीचा पर्दाफाश केला आहे. या घोटाळेबाजांनी आतापर्यंत विविध लोकांची तब्बल 103 कोटींहून अधिक रुपयांची फसवणूक केली आहे. हे सर्व गुन्हेगार, लोकांना पोलीस अधिकारी म्हणून सांगायचे आणि धमकावून मोठ्या प्रमाणात पैसे उकळायचे. पोलिसांचे नाव सांगितल्याने बहुतांश लोकांनी पोलीस ठाण्यात तक्रारही केली नाही. मात्र, यावेळी पीडितेच्या तक्रारीची आणि लोकल 18 बिहारच्या बातमीची दखल घेत पोलिसांनी सापळा रचला आणि या टोळीतील अनेक गुन्हेगारांना पकडले. आता त्यांची सखोल चौकशी करण्यात येत आहे.