'दादा तो मला त्रास देतोय...', बहिणीने वाढदिवसाला केक कापला, त्याच चाकूने भर रस्त्यात भोसकलं!

अनिल हा अभिषेकच्या बहिणीला वारंवार त्रास देत होता, तसंच तिच्यावर लग्नासाठी दबाव आणत होता. यानंतर बहिणीने होत असलेल्या या छळाची भाऊ अभिषेककडे तक्रार केली. यातून संतापलेल्या अभिषेकने अनिलला मारण्याची योजना आखली आणि 5 चाकू ऑनलाईन पद्धतीने मागवले. याचसोबत अभिषेकने अनिलच्या हालचालींवरही लक्ष ठेवायला सुरूवात केली.

शुक्रवारी अनिल दारू पित असताना अभिषेकने चाकूने भोसकून त्याची हत्या केली. अभिषेकने अनिलची हत्या करण्यासाठी जो चाकू वापरला, तोच चाकू बहिणीच्या वाढदिवसाचा केक कापण्यासाठी वापरण्यात आला होता. मध्य प्रदेशच्या गुनामध्ये ही खळबळजनक घटना घडली आहे.

दुसरीकडे दिल्लीतून समोर आलेल्या आणखी एका धक्कादायक घटनेत, बवाना परिसरात दोन गटांमधील वादात एका 29 वर्षीय तरुणाची चाकूने वार करून हत्या करण्यात आली, तर दोघे जण जखमी झाले. गस्त घालत असताना, एका पथकाला हल्ल्याची माहिती मिळाली आणि ते घटनास्थळी पोहोचले जिथे तीन जणांवर चाकूने वार केल्याचे आढळून आले', असे एका अधिकाऱ्याने पीटीआयला सांगितले.

तिघांनाही महर्षी वाल्मिकी रुग्णालयात नेण्यात आले, जिथे त्यापैकी एक नियाज याला मृत घोषित करण्यात आले. इतर दोघे, तोसिन (20) आणि निहाल (34) यांना उपचारासाठी लोकनायक जयप्रकाश (एलएनजेपी) रुग्णालयात पाठवण्यात आले. चाकू हल्ल्याच्या याप्रकरणात नरेला औद्योगिक क्षेत्रात गुन्हा दाखल करण्यात आला आहे.