दोन्ही पायांना पोलिओ, तरी बनला दिग्दर्शक, 'कुर्ला टू वेंगुर्ला'च्या डारेक्टरसाठी वीणा जामकरची हृदयस्पर्शी पोस्ट

वीणा जामकरने तिच्या पोस्टमध्ये लिहिलंय, "तुझी मेहनत, अभ्यास, भूमिका, लिडरशीप ह्या पलिकडे आहेत तुझ्यातल्या संवेदना... ज्या लाभतात अर्थातच दुःख -संकटांचा सामना करूनच. आणि ह्या संवेदना जोपासायच्या कि प्रवाह - पतीत होऊन सोडून द्यायच्या ह्याची पण निवडच करावी लागते! तू ती केलीस."

( Marathi Movie : बॉक्स ऑफिसला कोकणची भुरळ! 'दशावतार'नंतर 'कुर्ला टू वेंगुर्ला'ची हवा, कमाईचा आकडा आला समोर )

"तू 'सिनेमा दिग्दर्शक ' म्हणून खास आहेस. दोन्ही पायांना पोलिओ असलेली व्यक्ती सिनेमा दिग्दर्शक कशी बरं होऊ शकते असं मलाही वाटलंच होतं तुझ्याकडे बघून. पण मी वेळोवेळी अनुभवलं ते तुझ्यात 'नसलेलं ' मानसिक अपंगत्व, जे आमच्यापैकी बहुतेक जणांकडे थोडं फार आहेच. कल्पना करूनही समजू शकत नाही इतक्या अवहेलनेला सामोरं जाऊनही तुझ्या चेहऱ्यावर हसू उमलतं... अन्यायग्रस्त माणसाचं ' रडणं ' आणि त्या 'रडण्याचंच' भांडवल करणं हे तुझ्याकडून अपेक्षित असलेले ' गुण ' तुझ्या आसपासही फिरकत नाहीत.. आणि तिथेच तू खूप मोठा होतोस..!"

"कुर्ला टू वेंगुर्ला"चं बॉक्स ऑफिस वर कलेक्शन किती ह्यावर तुझं यश ठरत नाही.. तू तेव्हाच सगळं जिंकलंस जेव्हा पहिल्यांदा हातातली काठी बाजूला सारून, तू दिग्दर्शकाच्या खुर्चीवर विराजमान झालास... काय वाटलं असेल तेव्हा तुला...? लाडक्या, Thank You Very Much...तू तुझ्याच अस्तित्वाला अर्थ दिलास त्यासाठी! नाहीतर माझ्यासारख्या अनेकांनी कुणाकडे पाहिलं असतं? कुठून बळ मिळालं असतं? तू Super Hit है बॉस."

"अभिनेता कितीही उत्तम असो त्याला पाठबळ नसेल तर तो सगळं टॅलेंट असूनही अपंगच रहातो. आज आमचं पाठबळ ठरला आहे श्री. अमरजीत आमलेंचा " स्पंदन " परिवार. स्पंदन फिल्म मूव्हमेंट. कुणाच्या फिल्मसाठी एखादा गडगंज श्रीमंत हात पुढे करतो, कुणाच्या पाठीमागे पिढीजात सिनेमा धंद्यातला अनुभव कमी येतो. आमच्या पाठीशी आज 'स्पंदन परिवार' उभा राहिला आहे."

वाचा वीणा जामकरची संपूर्ण पोस्ट

'कुर्ला टू वेंगुर्ला' या सिनेमानं आतापर्यंत 26 लाखांची कमाई केली आहे. ग्रामीण भागातील तरुणांच्या मानसिकतेचा वेध घेत एका लग्नाची रंजक गोष्ट 'कुर्ला टू वेंगुर्ला' या सिनेमात दाखवण्यात आली आहे. सुनील तावडे, स्वानंदी टिकेकर, साईंकित कामत, वीणा जामकर हे कलाकार सिनेमात महत्त्वाच्या भुमिकेत आहेत.