Chhaava Movie: जबरदस्त..! विक्की कौशलचा ‘छावा’ मराठीतही होणार रिलीज, प्रेक्षकांची उत्सुकता शिगेला, कधी पाहता येणार?

'छावा' मराठीत रिलीज होणार असल्याची माहिती सांस्कृतिक मंत्री उदय सामंत यांनी दिली. त्यांनी X अकाऊंटवर एक पोस्ट शेअर करत ही आनंदाची बातमी शेअर केली आहे. त्यांनी 'छावा'चे दिग्दर्शक लक्ष्मण उतेकर यांच्या भेटीचाही फोटो शेअर केला.

'छावा' मराठीत प्रदर्शित होणार असला तरी अद्याप याबाबत रिलीज डेट किंवा नवी कोणतीही अपडेट समोर आलेली नाही. मात्र या माहितीने प्रेक्षक खूपच उत्सुक झाले आहेत. संभाजी महाराजांच्या जीवनावर आधारित हा भव्यदिव्य चित्रपट विक्की कौशलच्या दमदार अभिनयामुळे चर्चेत आहे. हिंदीमध्ये तुफान कमाई केल्यानंतर आता मराठी प्रेक्षकांसाठी हा चित्रपट त्यांच्याच भाषेत पाहण्याची सुवर्णसंधी मिळणार आहे.

दरम्यान, संभाजी महाराजांच्या जीवनावर आधारित 'छावा' या चित्रपटाने प्रेक्षकांच्या मनावर अधिराज्य गाजवले आहे. प्रेक्षकांमध्ये प्रचंड उत्साह असल्यामुळे थिएटरमध्ये प्रचंड गर्दी होत आहे, आणि तिकीट मिळवणेही कठीण झाले आहे. पहिल्या तीन दिवसांतच 'छावा'ने तब्बल 116.5 कोटींची घसघशीत कमाई केली आहे. 2025 चा मोठा ओपनर हा सिनेमा ठरला आहे.