Who Is Parag Jain: सिक्रेट मिशनचा बॉस झाला R&AW Chief, गुप्त युद्धाला मिळाला नवा सेनापती; खलिस्तान,पाकिस्तान,चीनचा थरकाप उडवणारा अधिकारी

सध्या पराग जैन हे R&AW अंतर्गत कार्यरत असलेल्या महत्त्वाच्या 'एव्हिएशन रिसर्च सेंटर' (ARC) चे प्रमुख आहेत. ARC हे R&AW चे तांत्रिक आणि गुप्तचर गोळा करणारे अत्यंत महत्त्वाचे अंग आहे. जम्मू-काश्मीरमधील पहलगाम दहशतवादी हल्ल्यानंतर भारताने केलेल्या अचूक प्रत्युत्तर कारवाईत – ऑपरेशन सिंदूर मध्ये – ARC च्या नेतृत्त्वाखाली पराग जैन यांनी पाकिस्तानी लष्कराच्या हालचालींबाबत HUMINT (मानवी गुप्तचर) आणि TECHINT (तांत्रिक गुप्तचर) च्या माध्यमातून महत्त्वपूर्ण माहिती पुरवली होती.

सध्या R&AW मध्ये जैन हे दुसऱ्या क्रमांकाचे वरिष्ठ अधिकारी असून थेट प्रमुखांना रिपोर्ट करतात. त्यांनी अनेक महत्त्वाचे ऑपरेशनल आणि गुप्तचर विभाग हाताळले आहेत. त्यांचा सखोल अनुभव या क्षेत्रांमध्ये आहे.

पराग जैन यांना आंतरराष्ट्रीय पातळीवरही अनुभव असून कॅनडाच्या ओटावा येथे त्यांची एक अत्यंत संवेदनशील नेमणूक झाली होती. तेथे त्यांनी शीख विभाजनवादी चळवळींवर लक्ष ठेवून काही नेटवर्क्समध्ये घुसखोरी करण्याचं काम केलं. त्यानंतर त्यांना 2022 मधील आर्थिक संकटाच्या काळात श्रीलंकेत पाठवण्यात आलं होतं. जिथे त्यांनी सत्तांतर आणि राजकीय अस्थिरतेच्या काळात प्रत्यक्ष अनुभव घेतला.

R&AW मध्ये दाखल होण्याआधी पराग जैन यांनी पंजाब राज्यातील अनेक महत्त्वाच्या पोलीस पदांवर काम केलं आहे. जसे की चंदीगडचे एसएसपी, लुधियाना परिक्षेत्राचे DIG, तसेच बठिंडा, मानसा आणि होशियारपूर येथेही त्यांनी काम केलं. पंजाबमधील भूमिगत चळवळी आणि सुरक्षेच्या स्थानिक संदर्भांचा त्यांना सखोल अनुभव आहे. जो आंतरराष्ट्रीय दहशतवादाशी लढताना उपयोगी ठरतो.

R&AW च्या नेतृत्वात पराग जैन यांची नियुक्ती अशा वेळी झाली आहे जेव्हा भारताला अनेक मोठ्या आव्हानांचा सामना करावा लागत आहे. सीमेपलीकडचा दहशतवाद, खलिस्तान चळवळीचा पुन्हा उद्रेक, चीन-पाकिस्तान यांचं वाढतं समन्वयन आणि हायब्रिड युद्धाचे बदलते तंत्रज्ञान अशा आव्हानांचा देश सामना करत असताना जैन यांच्याकडे महत्त्वाची जबाबदारी देण्यात आली आहे.