चौपाटीवर खायची मजाच न्यारी! अमरावतीत आलात अन् इथं नाही गेलात? मग केलं काय?

अमरावती: प्रत्येक शहराची एक वेगळी खाद्यसंस्कृती असते. तसेच त्या शहरात खवय्यांना भुरळ घालणारी काही ठिकाणं किंवा खाऊ गल्ली असतात. अमरावतीत देखील अशी काही ठिकाणं असून गाडगेनगर चौपाटी हे यापैकी एक आहे. सायंकाळच्या वेळी मोकळ्या हवेत फिरत काही चटपटीत खाण्याची इच्छा झाली तर चौपाटीवरची खाऊगल्ली बेस्ट पर्याय आहे. इथं पाणी पुरी, पाव भाजी, व्हेज पुलाव आणि बरेच चटपटीत पदार्थ खायला मिळतील.

अमरावतीतील गाडगेनगर म्हणजे शहराचे हृदय मानले जाते. इथं संत गाडगे महाराज यांचं मोठं मंदिर आहे. येथील पलाश लाईननंतर गाडगेनगर चौपाटी सुरू होते. गाडगेनगर ते राठी नगरपर्यंत ही चौपाटी आहे. सायंकाळी 6 वाजलेनंतर चौपाटीवर खवय्यांची गर्दी बघायला मिळते. इथली शेगाव कचोरी फेमस आहे. तसेच इथला लोणी स्पंज डोसा खाण्यासाठी तर आवर्जून खवय्ये येत असतात.

गाडगे नगरला आलात की तुम्हाला हवं ते फूड मिळू शकतं. व्हेज पुलाव, चायनिज, मोमोज हे सुद्धा या चौपाटीवर उपलब्ध आहे. त्याचबरोबर लस्सी, मावा कुल्फी यासाठी सुद्धा तुम्हाला कुठे दूर जाण्याची गरज नाही. हे सर्व पदार्थ एकाच लाईन मध्ये एकाच रोडला तुम्हाला मिळतील. इथलं भेल भंडार, चाट सेंटर हे सुद्धा प्रसिद्ध आहे.

दरम्यान, अमरावतीमध्ये राहणाऱ्या आणि मेसचे जेवण जेवणाऱ्या प्रत्येकांसाठी ही चौपाटी एक आठवण आहे. कारण याठिकाणी टेस्टी आणि गरमागरम पदार्थ मिळतात. प्रत्येक दुकानातील पदार्थाची काही न काही खासियत आहे.