Food Food : दुधीच्या सालाची चटणी बनवण्याची सोपी कृती, चविष्ट आणि पौष्टिक पर्याय, नक्की करुन पाहा

दुधी भोपळ्याच्या सालांचा उपयोग करुन केलेली ही चटणी स्वादिष्ट होते, जी खाणाऱ्यांना बोटे चाटायला लावेल. ही चटणी केवळ स्वादिष्टच नाही, तर आरोग्यासाठी खूप फायदेशीरसुद्धा आहे. चटणी बनवण्याची सोपी पद्धत शिकूया.

साहित्य दोघांसाठी

दुधी भोपळ्याचं साल: दुधी स्वच्छ धुऊन घ्या त्याचे लहान तुकडे करा.

हिरव्या मिरच्या: दोन-तीन

आलं: एक इंचाचा तुकडा

लसूण: चार-पाच पाकळ्या लसूण खात नसल्यास वगळा

जिरं: अर्धा चमचा

हिंग: चिमूटभर

मीठ: चवीनुसार

लिंबाचा रस: एक चमचा

बारीक चिरलेली कोथिंबीर

तेल: एक चमचा

कृती - प्रथम, एका कढईत तेल गरम करा. त्यात जिरं आणि हिंग घालून परतून घ्या. त्यात चिरलेली दुधी भोपळ्याची साल, हिरव्या मिरच्या, आलं आणि लसूण घालून साल किंचित मऊ होईपर्यंत तीन-चार मिनिटं परतून घ्या. गॅस बंद करा आणि मिश्रण थंड होऊ द्या. आता, भाजलेलं मिश्रण मिक्सरच्या जारमध्ये ओता. मीठ, लिंबाचा रस आणि चिरलेली कोथिंबीर घालून सर्व मिश्रण बारीक वाटून घ्या. स्वादिष्ट आणि पौष्टिक चटणी तयार आहे.