सतत मोबाईल वापरल्यानं होतो 'हा' गंभीर आजार, तज्ज्ञांनी दिला महत्त्वाचा इशारा

मोबाईलच्या अतिवापरामुळे अँड्रॉईड मेनिया आजाराची लक्षणे आढळून येत आहेत. लॉकडाऊन पूर्वी मानसोपचार तज्ज्ञांकडे महिन्याला येणाऱ्या 100 रुग्णापैकी 15 रुग्ण अँड्रॉईड मेनिया आजाराची लक्षणे असलेली होती. आता हे प्रमाण 30 ते 35 वर आले आहे, अशी माहिती छत्रपती संभाजीनगरशहरामधील मानसोपचार तज्ज्ञ डॉ. संदीप शिसोदे यांनी दिली आहे.

सध्या स्वस्तात आणि सहज उपलब्ध झालेले तंत्रज्ञान गरजेपेक्षा सवय बनलंय.  त्यात तरुणाईची संख्या मोठ्या प्रमाणात आहे. दुःखही सोशल मीडियाच्या माध्यमातून व्यक्त करण्याचा ट्रेंड सध्या चालू आहे. ऑनलाइन गेमिंग तरुण वर्ग सध्या मोठ्या प्रमाणात खेळत आहे. त्यामुळे या जीवनशैलीचा परिणाम मानसिक आरोग्यावर होतोय.

आत्मीयता, संवेदनशीलता आणि एकमेकांवरील विश्वासाचे नाते हरवल्याने स्वसंवादासह कुटुंब, नातेवाईक, मित्रमंडळी प्रत्यक्ष तरुणाई हरून बसल्याने अँड्रॉइड मेनिया संख्या वाढत आहे.त्यामुळे पालकांनी वेळीच सावध होत यावर नियंत्रणासाठी प्रयत्न करावा आणि प्रत्यक्ष संवादावरती भर द्यावा, असं डॉ. संदीप शिसोदे यांनी सांगितले.