शहर स्वच्छ आणि सुंदर दिसावे यासाठी सरसावले पर्यावरण योद्धे, तब्बल 2 लाख वृक्षांची केली लागवड Video

जालना : बियाणे, दाल मिल, कपडा तसेच अन्य लहान मोठ्या उद्योगामुळे उद्योग नगरी अशी बिरुदावली मिरवणाऱ्या जालना शहरात अनेक पायाभूत सुविधांचा अभाव होता. मात्र, मागील काही वर्षांमध्ये जालना शहर कात टाकत आहे. शहरातील रस्ते तसेच अन्य पायाभूत सुविधांमध्ये मोठ्या प्रमाणावर वाढ होते आहे. मात्र, शहरातील नागरिकांच्या बेजबाबदारपणामुळे शहरातील अनेक भागांमध्ये अस्वच्छता आढळून येते. याच गोष्टींवर मात करण्यासाठी जालन्यातील काही सामाजिक संस्था तसेच प्रशासनाने पुढाकार घेतला आहे. शहर स्वच्छ आणि सुंदर दिसावे यासाठी तब्बल 2 लाख वृक्षांची लागवड विविध संस्थांच्या माध्यमातून करण्यात आली आहे. या वृक्षांची निगा राखण्याची तसेच शहर स्वच्छ आणि सुंदर राखण्याचा संकल्प जालनाकरांनी केला.