सायंकाळी सात वाजताच होतात मोबाईल आणि टीव्ही बंद, महाराष्ट्रातील या गावाचा कौतुकास्पद निर्णय

पिंपळखुटा येथील सरपंच गजानन पडोळे यांच्याशी लोकल 18 ने संवाद साधला. तेव्हा ते सांगतात की, या उपक्रमामागील मुख्य उद्देश विद्यार्थ्यांमध्ये अभ्यासाची शिस्त निर्माण करणे हा आहे. सध्याच्या काळात मोबाईल हे ज्ञानाचं साधन असलं, तरी त्याचा अतिरेक मुलांच्या अभ्यासावर परिणाम करत आहे. ही बाब लक्षात घेऊन ग्रामपंचायतीच्या पुढाकारातून हा उपक्रम सुरू करण्यात आला. मराठवाड्यात गेलो असता, तेथील एका गावात हा उपक्रम असल्याचं मी बघितलं आणि विचार केला की आपल्याही गावात आपण हा उपक्रम सुरू करायला पाहिजे. तेथून परतल्यानंतर हा प्रस्ताव मी पालकांकडे ठेवला. त्यांनी लगेच होकार दिला आणि हा उपक्रम गेले 2 महिने आमच्याकडे सुरू आहे.

या दोन तासांच्या कालावधीत गावातील विद्यार्थी घरी बसून अभ्यास करतात. पालकही या वेळेत मुलांवर लक्ष ठेवतात. त्यामुळे मुलांमध्ये नियमित अभ्यासाची सवय लागली असून, शिस्त आणि एकाग्रता वाढल्याचे शिक्षकांचे म्हणणे आहे. काही पालकांनी तर या उपक्रमामुळे मुलांच्या वाचन-लेखनात आणि अभ्यासातील गतीत सकारात्मक बदल दिसत असल्याचे सांगितले.

अभ्यासाचा भोंगा या उपक्रमामुळे गावातील मुलांमध्ये शिस्त, एकाग्रता आणि शिक्षणाविषयीची आवड वाढत आहे. पिंपळखुटा गावाने दाखवून दिले आहे की, शिक्षण ही केवळ शाळेची जबाबदारी नसून संपूर्ण गावाने एकत्र येऊन प्रयत्न केले, तर मुलांचे भविष्य घडवता येते. आज हा उपक्रम परिसरातील इतर गावांसाठीही प्रेरणादायी ठरत आहे.