पुणे ते ठाणे आणि जळगाव ते अहिल्यानगर महापौर पदी कोण? कोणत्या पक्षाचा? वाचा पूर्ण यादी

महापालिकेच्या महापौरपदासाठी (PMC Mayor) भाजपच्या नगरसेविका मंजूषा नागपुरे यांच्या नावाची घोषणा भाजपकडून करण्यात आली. मंजूषा नागपुरे या अनुभवी नगरसेवक आहेत.

ठाणे महानगरपालिकेत शिवसेनेने एक हाती सत्ता मिळवल्यानंतर महापौर पदासाठी शिवसेनेच्या शर्मिला पिंपळोलकर निवडणूक प्रक्रिया पूर्ण करून महापौर पदाचा चार्ज स्वीकारला आहे.. मात्र उपमुख्यमंत्री एकनाथ शिंदे हे जिल्हा परिषद निवडणुकीसाठी दौऱ्यावर असल्याकारणाने महापौर शर्मिला पिंपळोलकर या महापौर पदाच्या खुर्चीवर विराजमान झाल्या नाहीत शिंदे ठाण्यात आल्या नंतर शर्मिला या कार्यालयात खुर्चीवर विराजमान होणार आहेत...

कल्याण डोंबिवली महापालिकेला अखेर महापौर मिळाला असून, शिवसेना शिंदे गटाच्या हर्षाली थविल यांची बिनविरोध निवड झाली आहे. राहुल दामले यांची उपमहापौरपदी निश्चित निवड झाली आहे.

जळगाव महापालिकेच्या महापौरपदी महायुतीकडून भाजपच्या दीपमाला काळे आणि उपमहापौरपदी शिवसेनेचे मनोज चौधरी यांची बिनविरोध निवड निश्चित झाली आहे. सोमवारी पालकमंत्री गुलाबराव पाटील आणि गिरीश महाजन यांनी दोन्ही नावांची थेट घोषणा केली.

अहिल्यानगर महापालिकेच्या महापौरपदी राष्ट्रवादी काँग्रेसच्या (अजित पवार गट) ज्योती गाडे यांची तर उपमहापौरपदी भाजपचे धनंजय जाधव यांची नावे पालकमंत्री राधाकृष्ण विखे यांनी जाहीर केली.

मिरा भाईंदरच्या महापौरपदावरून मराठी एकीकरण समितीने इशारा देऊनही भारतीय जनता पक्षाने डिंपल मेहता यांची निवड केली. मिरा भाईंदरमध्ये मराठी महापौरच झाला पाहिजे, अशी मागणी मराठी एकीकरण समितीने केली होती. परंतु भाजपचे आमदार नरेंद्र मेहता यांच्या वहिनी डिंपल मेहता यांना महापौरपदी बसविण्यात आले आहे.

वसई विरारमध्ये बहुजन विकास आघाडीचे अजीव पाटील यांना महापौरपदी बसण्याची संधी मिळाली आहे. बविआकडे स्पष्ट बहुमत असल्याने सुरुवातीला ही निवडणूक बिनविरोध होईल असे वाटले परंतु भारतीय जनता पक्षानेही महापौरपदासाठी अर्ज दाखल केला. परंतु महापौरपदाच्या निवडणुकीत अजीव पाटील यांनी अपेक्षेनुसार बाजी मारली.

उल्हासनगरमध्ये एकनाथ शिंदे यांच्या नेतृत्वाखालील अश्विनी निकम यांना महापौरपदी बसण्याची संधी मिळाली आहे. एकनाथ शिंदे यांनी सत्तास्थापनेची गणिते जुळवून आणून महापौरपदावर शिवसेनेची वाघीण बसवली.