कुणाला चपटी, कुणाला कोंबडी, कुणाला बकरं! निवडणूक कशी जिंकतात? सोळंके पॅटर्नने अजितदादांची राष्ट्रवादी अडचणीत

सुरेश जाधव, प्रतिनिधी, बीड : राष्ट्रवादी काँग्रेसचे माजलगावचे आमदार प्रकाश सोळंके यांनी निवडणूक जिंकण्यासाठीचा वेगळाच पॅटर्न कार्यकर्त्यांच्या बैठकीत सांगितला. विधानसभा निवडणुकीत शेवटच्या दोन दिवसांत दारुगोळा कशा पद्धतीने लागतो हे आमच्या कार्यकर्त्यांना चांगलं माहित आहे. कोणाला चपटी द्यावी लागते, कोणाला कोंबडा कापावा लागतो, कोणाला बकरे कापावे लागते, कोणाला लक्ष्मी दर्शन घडवावे लागते कार्यकर्त्यांना चांगलेच माहित आहे, असे सांगत निवडणूक काळात आपण काय काय करतो याची कबुलीच त्यांनी दिली आहे. नागपूरच्या लावणी प्रकरणाने पक्षावर मोठी टीका होत असताना प्रकाश सोळंके यांच्या कबुलीनाम्याने अजित पवार यांचा राष्ट्रवादी काँग्रेस पक्ष पुन्हा अडचणीत आला आहे.