नांदेड हादरलं! वैद्यकीय शिक्षण घेणारी तरुणी हॉस्टेलमध्ये आढळली मृत, राष्ट्रवादीच्या नेत्यावर गुन्हा दाखल

मयत तरुणीचं नाव आकांक्षा गायकवाड असून, ती सिडको येथील एका वैद्यकीय महाविद्यालयात शिक्षण घेत होती. आकांक्षा याच भागातील जीवन घोगरे पाटील यांच्या निवासस्थानी असलेल्या खासगी हॉस्टेलमध्ये राहत होती. शुक्रवारी दुपारी तिने राहत्या खोलीत गळफास घेतल्याचं उघड झालं. या घटनेनं परिसरात मोठी खळबळ उडाली.

आकांक्षाचे वडील मुंजाजी गायकवाड यांनी पोलिसांत दिलेल्या तक्रारीनुसार, आकांक्षाने गेल्या ८ ते १० महिन्यांपासून हॉस्टेलची फी भरली नव्हती. याच कारणावरून जीवन घोगरे पाटील हे तिला वारंवार मानसिक त्रास देत होते. सततचा तगादा आणि होणाऱ्या छळाला कंटाळूनच तिने हे टोकाचं पाऊल उचलल्याचे तक्रारीत म्हटलं आहे. या तक्रारीवरून सिडको ग्रामीण पोलीस ठाण्यात रात्री उशिरा गुन्हा नोंदवण्यात आला आहे.

मिळालेल्या माहितीनुसार, ज्या हॉस्टेलमध्ये ही घटना घडली, तिथे ४० ते ५० मुली वास्तव्यास आहेत. मात्र, धक्कादायक बाब म्हणजे या खासगी हॉस्टेलला कोणतीही अधिकृत परवानगी नसल्याची प्राथमिक माहिती समोर आली आहे. नियमांचे उल्लंघन, सुरक्षेच्या उपायोजनांचा अभाव आणि विद्यार्थिनींची सुरक्षितता यावरून आता प्रशासनावर प्रश्नचिन्ह उपस्थित होत आहे. तूर्तास पोलिसांनी राष्ट्रवादीच्या नेत्याविरोधात गुन्हा दाखल केला आहे. पुढील तपास केला जात आहे.