क्षणात सगळं संपलं, बुलढाण्यात पोलिसाचा विहिरीत आढळला मृतदेह, नेमकं काय घडलं?

मिळालेल्या माहितीनुसार, आत्महत्या केलेल्या पोलीस कर्मचाऱ्याचं नाव पंजाबराव शेळके असं आहे. ते बुलढाणा पोलीस मुख्यालयात हेड कॉन्स्टेबल या पदावर कार्यरत होते. पंजाबराव शेळके यांनी मेहकर तालुक्यातील बाबुलखेड येथील शेत शिवारात असलेल्या एका विहिरीत उडी घेऊन आत्महत्या केली.

रविवारी ही घटना उघडकीस आल्यानंतर परिसरात एकच गर्दी झाली होती. घटनेची माहिती मिळताच स्थानिक पोलिसांनी तातडीने घटनास्थळी धाव घेतली. गावकऱ्यांच्या मदतीने त्यांचा मृतदेह विहिरीबाहेर काढण्यात आला असून, तो शवविच्छेदनासाठी जवळच्या शासकीय रुग्णालयात पाठवण्यात आला आहे.

पंजाबराव शेळके यांनी हे टोकाचं पाऊल का उचललं? याचे कारण अद्याप समजू शकलं नाही. घटनास्थळावरून कोणतीही 'सुसाईड नोट' अद्याप पोलिसांच्या हाती लागलेली नाही. एका पोलीस कर्मचाऱ्याने अशाप्रकारे अचानक आत्महत्या केल्याने कुटुंबावर दुःखाचा डोंगर कोसळला आहे. या प्रकरणी मेहकर पोलीस ठाण्यात गुन्हा नोंद करण्यात आला आहे. कौटुंबिक वाद, कामाचा ताण की अन्य काही वैयक्तिक कारण, या सर्व बाजूंनी पोलीस सध्या तपास करत आहेत.