'मुघल अ आझम' मध्ये दिलीपकुमारांसाठी बनवली होती शेरवानी, मराठी सेलिब्रिटींची फेव्हरेट छ.संभाजीनगरची खास हिमरू शाल

भारतीय चित्रपटसृष्टीतील अजरामर कलाकृती 'मुघल-ए-आझम' मध्ये प्रसिद्ध अभिनेते दिलीपकुमार यांनी परिधान केलेला पोशाख हा 'औरंगाबाद हिमरू फॅक्टरी' छत्रपती संभाजीनगर येथे विणलेल्या हिमरू कापडाचा होता. हा ऐतिहासिक वारसा आजही नवाबपुऱ्याच्या लूमवर जिवंत आहे. परंपरा, कष्ट आणि कौशल्य यांचा संगम असलेल्या या कलेचा प्रवास, वैशिष्ट्ये आणि आजच्या काळातील आव्हाने, याबद्दल सविस्तर माहिती लोकल 18 च्या माध्यमातून जाणून घेऊ.

हिमरू हे पूर्णपणे हाताने विणले जाणारे कापड आहे. यासाठी दोन कारागिरांची गरज असते, जे एकाच वेळी ताळमेळ बसवून काम करतात. यात कोणतीही आधुनिक यंत्रणा वापरली जात नाही, त्यामुळे प्रत्येक धागा हाताने सेट करावा लागतो. यामुळेच यातून रोजगाराच्या संधीही निर्माण होतात. एक मीटर हिमरू शाल किंवा कापड तयार होण्यास लागणारा वेळ जवळपास 12 ते 15 दिवसांचा असतो. हे काम अत्यंत कष्टाचे आणि वेळखाऊ आहे. विणकामाची गुंतागुंत आणि डिझाइनच्या बारकाव्यावर हा वेळ अवलंबून असल्याचे इम्रान कुरेशी यांनी बोलताना सांगितले.

आजही आम्ही तोच 'दिलीप कुमार पॅटर्न’ कॉटन आणि जरीमध्ये तयार करतो, ज्याला मोठी मागणी असते. भारताचे पहिले राष्ट्रपती डॉ. राजेंद्र प्रसाद आणि जयपूरच्या महाराणी यांनीही या कलेची प्रशंसा केली. तसेच याबरोबरच या ठिकाणी मराठी सिने अभिनेत्री सई ताम्हणकर, यासह विविध अभिनेते व अभिनेत्रींनी भेट दिलेली आहे, असे देखील कुरेशी यांनी सांगितले.