'तुम्हाला कॉल येईल, उचलू नका, ब्लॉक करा', शेवटचा फोन करून निकीताने स्वत:ला संपवलं, संभाजीनगरमधील घटना!

निकिता रवींद्र पवार संभाजीनगरमध्ये एका खासगी कंपनीमध्ये नोकरी करत होती. घटनेच्या दिवशी ती रूमवर एकटीच होती. सायंकाळी, शेजारी राहणाऱ्या मैत्रिणी तिला जेवणासाठी बोलवायला गेल्या. मात्र, आतून कोणताही प्रतिसाद आला नाही. त्यामुळे त्यांनी खिडकीतून पाहिले असता, निकिताने गळफास घेतल्याचे त्यांना दिसले. हे दृश्य पाहून घाबरलेल्या मैत्रिणींनी तत्काळ घटनेची माहिती घरमालकाला दिली. पोलीस आणि नागरिकांच्या मदतीने निकिताला तातडीने घाटी रुग्णालयात नेण्यात आले, परंतु डॉक्टरांनी तिला मृत घोषित केले. या प्रकरणी सिडको पोलीस ठाण्यात आकस्मिक मृत्यूची नोंद करण्यात आली असून, पुढील तपास जमादार तेलुरे करत आहेत.

आत्महत्येच्या एक दिवस आधी निकिताने आपल्या कुटुंबीयांशी फोनवरून संवाद साधला होता. त्यावेळी ती खूप घाबरलेली होती, असे तिच्या नातेवाईकांनी सांगितले. तिने कुटुंबीयांना, 'तुमच्या मोबाईलवर एक कॉल येईल, तो तुम्ही ब्लॉकलिस्टमध्ये टाका, त्याचा कॉल घेऊ नका' अशी विनंती केली होती. तिच्या भावाने दिलेल्या माहितीनुसार, निकिताचा कॉल कट झाल्यानंतर लगेचच कुटुंबीयांच्या नंबरवर २५ वेळा अनोळखी नंबरवरून कॉल आले होते.

निकिताने कुटुंबीयांना असा कॉल का सांगितला? तिला कोणी ब्लॅकमेल करत होते का? तो २५ वेळा कॉल करणारा अनोळखी नंबर कोणाचा होता? असे अनेक प्रश्न आता अनुत्तरित आहेत. पोलिसांनी निकिताचा मोबाईल जप्त केला असून, तिच्या कॉल डिटेल्सवरून पोलीस तपास करत आहेत. या तपासातूनच तिच्या आत्महत्येमागील नेमकं कारण आणि त्या २५ कॉल्सचं रहस्य उलगडण्याची शक्यता आहे.