शिवकालीन धोप तलवार अन् दुर्मिळ वस्तूंचा खजिना, संभाजीनगरचं संग्रहालय पाहिलं का?

छत्रपती संभाजीनगर : छत्रपती शिवाजी महाराज यांचा राज्याभिषेक दिन राज्यात 6 जून रोजी मोठ्या उत्साहात साजरा केला जातो. या दिवशी अनेकजण आवर्जून रायगड आणि इतर शिवकालीन किल्ल्यांना भेट देतात. तसेच काहींचा ऐतिहासिक वस्तूसंग्रहालयात जावून शिवकालीन वस्तू पाहण्याकडे कल असतो. छत्रपती संभाजीनगरमध्ये असंच एक ऐतिहासिक वस्तू संग्रहालय असून या ठिकाणी शिवकालीन दुर्मिळ वस्तूंचा खजिना आहे. श्रीमंत छत्रपती शिवाजी महाराज पुरातन वस्तू संग्रहालयाबाबत संचालक डॉक्टर शांतीलाल पुरवार यांनी माहिती दिलीय.

श्रीमंत छत्रपती शिवाजी महाराज पुरातन वस्तू संग्रहालयात शिवाजी महाराजांच्या काळातील अनेक दुर्मिळ वस्तू आहेत. यामध्ये शिवाजी महाराजांच्या सैन्यातील सैनिक ज्या तलवारी वापरायचे त्या तलवारींचा संग्रह याठिकाणी करण्यात आलंय. तसेच छत्रपती शिवाजी महाराज वापरत असलेली धोप तलवार या या संग्रहालयाचं आकर्षण आहे. शिवकालीन विविध हत्यारे यात जांबिया, करवाल, खंजिर, सुरा, बिछवा आदी प्रकार या ठिकाणी आहेत. त्या सोबतच मुल्हेरी तलवार, मेवाडी तलवार, तेगा तलवार, सैफ तलवार, सिरोही तलवार अशा तलवारीचे प्रकारही याठकिाणी पाहता येतील.