Kolhapur News: जिकडे-तिकडे 'चपलाच चपला', 10 ट्रॅक्टर भरून उचलला चपलांचा ढीग; 25 तासांत कोल्हापूर स्वच्छ!

विसर्जनाची मिरवणूक संपताच महापालिकेच्या आरोग्य विभागातील कर्मचाऱ्यांनी मुख्य मिरवणूक मार्गाची सफाई सुरू केली. बिंदू चौक, मिरजकर तिकटी, महाद्वार रोड, पापाची तिकटी, बिनखांबी गणेश मंदिर, खरी कॉर्नर, गंगावेश अशा अनेक प्रमुख रस्त्यांवर पडलेला चपलांचा ढिग आणि इतर कचरा उचलण्यात आला. या कामासाठी 10 ट्रॅक्टरहून अधिक गाड्या लागल्या आणि तब्बल 10 ट्रॉलींपेक्षा जास्त कचरा गोळा करण्यात आला.

याव्यतिरिक्त, विसर्जन स्थळांवरही विशेष नियोजन करण्यात आले होते. कृत्रिम कुंड आणि इराणी खण अशा ठिकाणी पवडी, आरोग्य, विद्युत, उद्यान आणि इतर विभागांचे तीन हजार कर्मचारी सकाळपासूनच कामावर होते. वैद्यकीय पथके आणि अग्निशमन दलाची पथकेही मदतीसाठी तैनात होती. गणपती मूर्ती आणण्यासाठी 100 टेम्पो आणि विसर्जनासाठी 415 हमाल कार्यरत होते. या सर्वांनी अहोरात्र काम करून शहराची स्वच्छता राखण्यात महत्त्वाची भूमिका बजावली. प्रशासक के. मंजुलक्ष्मी यांनी या सर्व कर्मचाऱ्यांचे आभार मानले.