देवाचा फोटो लावा, मेधा कुलकर्णी ठाम, पोलीस अधिकाऱ्याने फोटो हिसकावला, मंचरमध्ये दर्गा-मंदिर वाद पुन्हा पेटला

हिंदू देवी देवतांचा फोटो लावण्यासाठी खासदार मेघा कुलकर्णी यांनी यावेळी आग्रह धरला. मात्र पोलिसांनी टताई तुम्ही असे करू नका' म्हणून विनंती केली. मात्र मेघा कुलकर्णी फोटो लावण्यावर ठाम असल्याचे पाहून पोलिस उपविभागीय अधिकारी अमोल मांडवे यांनी देवाचा फोटो मेघा कुलकर्णी यांच्या हातातून हिसकावून घेतल्याने काही काळ तणावाचे वातावरण निर्माण झाले होते. त्यानंतर प्रशासनाकडून खबरदारीचा उपाय म्हणून संबंधित दर्ग्याला कुलूप लावण्यात आले आहे.

यावेळी दर्ग्याच्या आसपास राहणाऱ्या मुस्लिम कुटुंबाकडे आधारकार्डची मागणी मेधा कुलकर्णी यांनी केली. आम्ही यांना ओळखतो, असे काही नागरिक सांगत असतानाही मेधा कुलकर्णी यांनी जबरदस्तीने त्यांच्याकडे ओळखपत्राची मागणी केली. दोन तीन वरिष्ठ पोलीस अधिकारी आणि आठ-दहा पोलीस कर्मचारी असतानाही मेधा कुलकर्णी यांनी अत्यंत आक्रमक पद्धतीने तेथे राहणाऱ्यांना प्रश्न विचारून त्यांना खडसावण्याचा प्रयत्न केला.

या घडामोडींमुळे मंचर शहरात तणावपूर्ण आणि संवेदनशील वातावरण निर्माण झाले असून कायदा आणि सुव्यवस्था राखण्यासाठी पोलीस बंदोबस्त वाढवण्यात आला आहे. काही दिवसांपूर्वी मंचर येथील एका दर्ग्याच्या भिंतीचा काही भाग कोसळल्यानंतर त्या ठिकाणी खाली मंदिर असल्याचा दावा हिंदुत्ववादी संघटनांकडून करण्यात आला होता. या प्रकरणानंतर प्रशासनाने संबंधित दर्ग्याचे काम तात्पुरते थांबवले होते.

आता मंचरमध्येच असलेल्या पांडवकालीन बारवही वक्फ बोर्डाने काबीज केल्याचा आरोप हिंदुत्व संघटनांनी केला आहे. तसेच या बारवाच्या शेजारी असलेला दर्गा अनधिकृत असल्याचा दावा देखील करण्यात येत आहे. दुसरीकडे मुस्लिम समाजाकडून मात्र दर्गा अधिकृत असल्याचे सांगितले जात आहे.