तुळजाभवानी मंदिरात होणार 56 कोटी रुपयांची कामे, नेमकं काय काय बदल होणार? VIDEO

धाराशिव : श्री तुळजाभवानी मंदिरात मंदिर संस्थानच्या स्वनिधीतून सुमारे 56 कोटी रुपयांची कामे हाती घेतली जात आहेत. पुरातत्त्व विभागाच्या सूचनेनुसार मंदिराच्या ऐतिहासिक वास्तूचे जतन संवर्धन तसेच भाविकांच्या सुविधांमध्ये वाढ करण्याच्या अनुषंगाने ही कामे होणार आहेत. कामे सुरू असताना भाविकांची काही काळ गैरसोय होणार असली तरी दीर्घकालीन सुविधांचा विचार करून सहकार्य करावे, असे आवाहन जिल्हाधिकारी तथा मंदिर संस्थानचे अध्यक्ष डॉ. सचिन ओम्बासे यांनी केले आहे.

मंदिराचे ऐतिहासिक महत्त्व लक्षात घेता हाती घेतलेली कामे ही पूर्णतः पुरातत्व विभागाच्या सूचनेनुसारच करण्यात येणार आहेत. तसेच याबाबतची निविदा पुरातत्व विभागानेच काढली आहेत. लवकरच या निविदा उघडण्यात येणार आहेत आणि यानंतर महिनाभरात कामांना सुरुवात करण्यात येणार आहे.