4 हजार जमवले अन् आठवडी बाजार गाठला, 10 रुपयांची वस्तू विकून आता महिन्याला 75 हजारांची उलाढाल

धाराशिव : धाराशिव जिल्ह्यातील भूम शहरातील गणेश रामलिंग गरड यांची ही कहाणी आहे. त्यांनी 2009 मध्ये कॅरम विक्रीचा व्यवसाय सोडून स्टेशनरी व्यवसायाला सुरुवात केली. घरची परिस्थिती अत्यंत हलाखीची होती. त्यामुळे काहीतरी करून दाखवण्याची जिद्द त्यांच्या होती. पण हाती भांडवल नव्हते. अशा परिस्थितीत त्यांनी कमीत कमी भांडवलात स्टेशनरी व्यवसाय सुरू करता येऊ शकतो, हे त्यांच्या लक्षात आले. त्यानंतर त्यांनी जेमतेम चार हजार रुपये जमवले आणि स्टेशनरीचा व्यवसाय सुरू केला.

सुरुवातीला त्यांनी पुण्यावरून 4 हजार रुपयांचे साहित्य खरेदी केले आणि पहिल्या दिवशी त्यांनी आठवडी बाजारात दुकान सुरू केले. त्यात त्यांना केवळ 250 रुपयांचा धंदा झाला. त्यानंतर त्यांनी आठवड्यातील 6 दिवस आठवडी बाजारात दुकान लावण्यास सुरुवात केली. आता सध्या त्यांना या व्यवसायातून दिवसाकाठी अडीच ते तीन हजार रुपयांची उलाढाल होत आहे.